Nnwom 45 - KYERƐW KRONKRON

Ɔhene ne ayeforo

Wɔde ma dwonkyerɛfo sɛ wɔnto no “Sukooko” nne so. Kora mma nnwenho, adɔde dwom

¹ Asɛmpa ayɛ me koma ma abu so. Mɛka ade a mayɛ mama ɔhene no! Me tɛkrɛma yɛ ɔkyerɛwfo a ne nsa yɛ hare kyerɛwdua.

² Wo ho yɛ fɛ sen nnipa mma, wɔde dom ahyɛ w’anom ma. Enti na Onyankopɔn ahyira wo daa.

³ Otumfo, fa w’afoa bɔ w’asen, fa w’anuonyam ne w’ahensɛm bɔ wo ho so.

⁴ Na fa w’ahensɛm no tew mu kɔ w’anim ma nokware ne trenee a wɔabrɛ no ase, na wo nifa nkyerɛkyerɛ w’ade a ɛyɛ hu.

⁵ W’agyan ano yɛ nnam, aman bɛhwehwe ase w’anim, ɛwɔ ɔhene atamfo komam.

⁶ Onyankopɔn, w’ahengua wɔ hɔ daa daa, w’ahenni poma yɛ trenee poma.

⁷ Wodɔ trenee, na wotan abɔnefosɛm, enti na Onyankopɔn, wo Nyankopɔn, de anigye ngo asra wo sen wo mfɛfo.

⁸ Kurobow ne pɛprɛ ne bɛwewonua yi hua wo ntade nyinaa mu, sanku a wɔbɔ asommɛn aban mu ma w’ani gye.

⁹ Ahene mmabea wɔ wo mmea anuonyamfo mu, wo dɔyere abegyina wo nifa, Ofir sika mu.

¹⁰ Ɔbabea, tie, na hwɛ, na yɛ aso, na ma wo werɛ mfi wo man ne w’agya fi.

¹¹ Na ɔhene ani asɔ w’ahoɔfɛ, na ɔne wo wura, na sɔre no.

¹² Na Tiro babea de ayɛyɛde ba, na ɔman mu adefo bɛdɛfɛdɛfɛ wo.

¹³ Ɔhene babea wɔ anuonyam kɛse mu, ɔdan mu, wɔde sikatam abu n’adurade.

¹⁴ Ɔhyɛ mmobom atade, na wɔde no brɛ ɔhene, wɔde mmabun a wɔyɛ ne mfɛfo di n’akyi brɛ wo.

¹⁵ Wɔde anigye ne ahosan na ɛde wɔn reba, wɔkɔhyɛn ɔhene aban mu.

¹⁶ Wo mma besi w’agyanom anan mu, wode wɔn besisi asase nyinaa so ahene.

¹⁷ Mɛma wɔakae wo din, awo ntoatoaso nyinaa mu, enti na aman beyi wo ayɛ daa daa.