Nnwom 40 - KYERƐW KRONKRON

Aseda ne adesrɛ mpaebɔ

Wɔde ma dwonkyerɛfo. Dawid dwom

¹ Ɔtwɛn na metwɛn AWURADE, na ɔyɛɛ aso maa me,

² na ɔtee me sufrɛ. Na oyii me fii ɔsɛe amoa mu, fii atɛkyɛ mu, na ɔde me nan sii ɔbotan so, ɔmaa m’anammɔn tintimii.

³ Na ɔde dwom foforo ahyɛ m’anom, yɛn Nyankopɔn ayeyi dwom. Nnipa bebree behu asuro, na wɔabata AWURADE ho.

⁴ Nhyira ne nnipa a wɔde wɔn ani ato AWURADE so, na wɔnnan wɔn ho nkɔ ahantanfo nkyɛn ne wɔn a wɔman di anyame huhu akyi.

⁵ AWURADE, me Nyankopɔn, w’anwonwade ne w’adwene, woama adɔɔso ama yɛn, wɔrentumi mfa biribi nto wo ho; anka mɛka na makasa ho, ɛdɔɔso sen sɛ wobetumi akan.

⁶ Wompɛ afɔrebɔ ne ayɛyɛde, woasiesie aso de ama me, wummisa ɔhyew afɔre ne bɔne ho afɔre.

⁷ Ɛnna mekaa sɛ: Hwɛ, mereba, wɔakyerɛw me ho asɛm nhoma mmobɔwee no mu.

⁸ Nea mepɛ ne sɛ mɛyɛ nea wo, me Nyankopɔn, wopɛ, na wo mmara wɔ me komam.

⁹ Maka trenee ho asɛmpa asafo kɛse mu, hwɛ, meremmua m’ano, AWURADE, wunim.

¹⁰ Mankora wo trenee so me komam, maka wo nokware ne wo nkwagye, mansiw w’adɔe ne wo nokware so, asafo kɛse mu.

¹¹ Wo AWURADE, worensiw me wo mmɔborohunu so, w’adɔe ne wo nokware bɛbɔ me ho ban daa,

¹² Na bɔne a wonnim ano atwa me ho ahyia, m’amumɔyɛ aso me mu a ɛmma minhu ade bio, ɛdɔɔso sen me ti so nwi, na me koma agyaw me.

¹³ AWURADE, ma ɛnyɛ wo fɛ sɛ wubegye me, AWURADE, yɛ ntɛm bɛboa me!

¹⁴ Ma wɔn a wɔhwehwɛ me kra asɛe no no ani nwu, na wɔn anim ngu ase, ma wɔn a wɔpɛ me bɔne nsan wɔn akyi, na wɔnnan ahohorafo!

¹⁵ Wɔn a wose me sɛ: Wiɛ, wiɛ! No, ma wɔn ho nnwiriw wɔn, wɔn aniwu akatua so.

¹⁶ Ma wɔn a wɔhwehwɛ wo nyinaa nni ahurusi, na wɔn ani nnye wo ho; ma wɔn a wɔdɔ wo nkwagye nka daa sɛ: Wɔnkamfo AWURADE kɛseyɛ.

¹⁷ Na me de, meyɛ mmɔbɔ, na meyɛ ohiani de, nanso AWURADE dwen me ho. Wone me boafo ne me gyefo, me Nyankopɔn, ntwentwɛn wo nan ase!