Nnwom 39 - KYERƐW KRONKRON

Amanehunu mu boasetɔ

Wɔde ma dwonkyerɛfo Yedutun. Dawid dwom

¹ Mekae sɛ: Mɛhwɛ m’akwan yiye, na mamfa me tɛkrɛma manyɛ bɔne. Mede nnareka meso m’ano, sɛ ɔbɔnefo wɔ m’anim yi.

² Medan mum meyɛɛ komm, mimuaa m’ano, papa ho, nanso me yaw mu yɛɛ den.

³ Me koma yɛɛ hyerehyere wɔ me mu, meredwennwen no, na ogya no dɛwee, na mede me tɛkrɛma mekasae.

⁴ AWURADE, ma minhu m’awiei ne me nna kakra a wɔasusuw no, ma minhu me kyɛ a mammɛkyɛ.

⁵ Hwɛ, woayɛ me nna nsama pɛ, na me mfe nyɛ hwee, w’anim. Ampa ara, onipa asi so sɛ dɛn ara a, na ɔyɛ ohuruhuro ara kwa. Sela

⁶ Ampa ara, onipa nam sɛ sunsuma kwa. Ampa ara, wɔhaw wɔn ho ohuruhuro ho; wɔhyɛ da so, na wonnim nea ɔbɛboa ano.

⁷ Na afei, AWURADE, dɛn na metwɛn? Wo so na m’ani da.

⁸ Gye me fi me mmarato nyinaa mu, mfa me mma, na ɔkwasea mmmɔ me ahohora.

⁹ Matɔ mum, mimmue m’ano, efisɛ wo na woayɛ.

¹⁰ Yi wo haw fi me so. Wo nsa ano hwe rehyew me.

¹¹ Sɛ wode amumɔyɛ ho animka twe onipa aso a, woma n’ahoɔfɛ hyew sɛ nwewee yɛ. Ampa ara, nnipa nyinaa yɛ ohuruhuro. Sela

¹² AWURADE, tie me mpaebɔ, na yɛ aso tie me sufrɛ. Mmua w’ano me nusu ho, na meyɛ wo hɔho, meyɛ ɔmamfrani sɛ m’agyanom nyinaa.

¹³ Yi w’ani fi me so, na mentew m’anim, ansa na mafi ha, na wɔanhu me bio.