Nnwom 38 - KYERƐW KRONKRON

Amanehunu mu ahonu dwom

Dawid dwom a wɔde bɔ nkae

¹ AWURADE, ntwiw m’anim w’abufuw mu, na ntwe m’aso w’anibere mu;

² na w’agyan awowɔ me, na wo nsa aduru me so.

³ W’abohuru nti ahoɔden bi nni me honam mu, me bɔne nti akwahosan bi nni me nnompe mu;

⁴ na me mfomso aboro me ti so, ɛden me so sɛ adesoa duruduru.

⁵ M’akuru bɔn, na aporɔw m’agyimisɛm nti.

⁶ Mapompono, na mapua koraa, da mu nyinaa mede awerɛhow menam foofoo.

⁷ Na ahyehyekuru ayɛ m’asen mu ma, na ahoɔden bi nni me honam mu;

⁸ mahodwow, na mabubu pasaa, me koma apinisi nti misu dennen.

⁹ AWURADE, nea mepɛ nyinaa da w’anim, na me pene nhintaw wo.

¹⁰ Me koma pere katirikatiri, m’ahoɔden atu, na m’aniwa hann po nni me ho bio.

¹¹ M’adɔfo ne me nnamfo afi me haw no ho akogyina nsrɛnso, na m’abusuafo gyinagyina akyirikyiri.

¹² Na wɔn a wɔhwehwɛ me kra no asum me afiri, na wɔn a wɔpɛ me bɔne no ka me sɛe ho asɛm, na wodwen nnaadaasɛm da mu nyinaa.

¹³ Na me de, mete sɛ ositifo a ɔnte asɛm, na mete sɛ mum a ommue n’ano.

¹⁴ Na mayɛ sɛ onipa a ɔnte asɛm na n’anom nni ntuatuaano.

¹⁵ Na wo, AWURADE, na m’ani da wo so, AWURADE, me Nyankopɔn, wubebua.

¹⁶ Na mise: Mma wɔn ani nnnye me ho, na sɛ me nan watiriw a, wɔanhoahoa wɔn ho wɔ me so.

¹⁷ Na mereyɛ mahwe ase, na me yaw wɔ m’anim daa.

¹⁸ Na meka me mfomso, me bɔne nti me werɛ ahow.

¹⁹ Na m’atamfo ho yɛ wɛwɛwɛ, wɔn ho yɛ den, na wɔn a wɔtan me kwa no dɔɔso.

²⁰ Na wɔde bɔne tua papa so ka, papa a midi akyiri nti wɔpɛ me ho asɛm.

²¹ AWURADE, nnyaw me, me Nyankopɔn, mma wo ne me ntam nnware.

²² Yɛ ntɛm bɛboa me, AWURADE, m’agyenkwa!