Nnwom 37 - KYERƐW KRONKRON

Abɔnefo ahotɔ nkyɛ

Dawid de

¹ Nhoran wo bo nnebɔneyɛfo nti, mma wo bo nnhaw wo, amumɔyɛfo ho;

² na ɛrenni da bi na wɔatwa wɔn agu sɛ sare, na wɔakisa sɛ wura momono.

³ Bata AWURADE ho, na yɛ papa, tena asase so, na di nokware,

⁴ na ma w’ani nka AWURADE ho, na wama wo nea wo koma pɛ.

⁵ Fa wo kwan hyɛ AWURADE nsam, na fa wo ho to no so, na ɔno na ɔbɛyɛ,

⁶ na wayi wo trenee adi sɛ adekyee, ne wo bem sɛ owigyinae.

⁷ Yɛ komm ma AWURADE, na tɔ wo bo ase twɛn no. Nhoran wo bo, nea ne kwan asi no yiye no nti, onipa a odi ne koko so asɛm so nti.

⁸ Ma abufuw ntwa, na gyae bo bɔne yɛ, nhoran wo bo, na ebewie bɔne nko,

⁹ na wobeyi nnebɔneyɛfo hɔ, na wɔn a wɔtwɛn AWURADE no, wɔn na wobenya asase no adi.

¹⁰ Ate kakraa sɛ na ɔbɔnefo nni hɔ, na wɔhwehwɛ ne tenabere a, na onni hɔ.

¹¹ Na ahobrɛasefo benya asase no adi, na wɔagye wɔn ani asomdwoe bebree mu.

¹² Ɔbɔnefo susuw ɔtreneeni ho asɛm, na ɔtwɛre ne se gu no so:

¹³ AWURADE serew no, efisɛ wahu sɛ ne da reba.

¹⁴ Abɔnefo atwe nkrante, na wɔakuntun wɔn ta mu, sɛ wɔbɛma ɔmanehunufo ne ohiani ahwe ase, na wɔakum wɔn a wɔn abrabɔ ye:

¹⁵ Wɔn nkrante bɛwɔ wɔn ara komam, na wɔn ta abubu.

¹⁶ Ade kakra a onipa trenee wɔ no ye sen abɔnefo bebree ahonyade dodow.

¹⁷ Na abɔnefo abasa bebubu, na AWURADE wowaw treneefo.

¹⁸ AWURADE nim wɔn a wodi mu no nna, na wɔn agyapade bɛtena hɔ daa.

¹⁹ Wɔn ani renwu bere bɔne mu, na wɔbɛmee, ɔkɔm mmere mu.

²⁰ Na abɔnefo bɛyera, na AWURADE atamfo bɛyɛ sɛ sare momono fɛfɛ, wɔbɛhyew awie sa sɛ owusiw.

²¹ Ɔbɔnefo fɛm, na ontua, na ɔtreneeni hu mmɔbɔ, na ɔma.

²² Na wɔn a wahyira wɔn na ebedi asase no, na wɔn a wabɔ wɔn dua no, wobeyi wɔn hɔ.

²³ AWURADE na ɔde onipa anammɔn sisi yiye, na ne kwan sɔ n’ani,

²⁴ sɛ ɔhwe ase a, ɔremmea fam koraa, efisɛ AWURADE kura ne nsam.

²⁵ Mayɛ abofra, na afei mabɔ akora, nanso minhuu onipa trenee a wɔapa no anaasɛ n’asefo srɛ aduan.

²⁶ Ohu mmɔbɔ daa, na ɔde fɛm, na n’asefo nso yɛ nhyira.

²⁷ Fi bɔne ho na yɛ papa, na woatena hɔ daa;

²⁸ efisɛ AWURADE dɔ atemmu, na ɔrennyaw n’ahotefo. Ɔhwɛ wɔn so daa, na abɔnefo asefo de, wobeyi wɔn hɔ.

²⁹ Treneefo benya asase no adi, na wɔatena so daapem.

³⁰ Ɔtreneeni ano ka nyansasɛm, na ne tɛkrɛma bu atɛntrenee;

³¹ ne Nyankopɔn mmara wɔ ne komam, na ne nan nwatiriw.

³² Ɔbɔnefo tɛw ɔtreneeni, na ɔhwehwɛ no akum no.

³³ AWURADE rennyaw no ne nsam, na sɛ wobu no atɛn a, ɔremmu no fɔ.

³⁴ Twɛn AWURADE, na fa ne kwan so, na ɔbɛma wo so, na woanya asase no adi; sɛ wogu abɔnefo ase a, wubehu.

³⁵ Mahu ɔbɔnefo a odi tumi, na ɔdennan sɛ dua frɔmm a anya asiye,

³⁶ na obi twaa mu no, na hwɛ, onni hɔ, na mehwehwɛɛ no, nanso manhu no.

³⁷ Kari onipa a ɔyɛ pɛ, na hwɛ nea ɔteɛ; sɛ saa onipa no awiei yɛ asomdwoe.

³⁸ Na mmaratofo de, wɔbɛsɛe wɔn nyinaa prɛko, abɔnefo ase de, wobegu.

³⁹ Na treneefo nkwagye fi AWURADE, ɔne wɔn guankɔbea, ahohia da mu.

⁴⁰ Na AWURADE boa wɔn, na ogye wɔn, oyi wɔn fi abɔnefo nsam, na ogye wɔn nkwa, efisɛ wɔde wɔn ho to no so.