Nnwom 36 - KYERƐW KRONKRON

Onyankopɔn adɔe

Wɔde ma dwonkyerɛfo. AWURADE akoa Dawid de

¹ Ɔbɔnefo mmarato kasa wɔ me koma mu: Onyankopɔn suro biara nni n’ani so.

² Na obu ne ho bi, n’ankasa ani so, sɛ wɔrenhu n’amumɔyɛ na wɔakyi.

³ N’anom nsɛm yɛ ahuhusɛm ne nnaadaa, wagyae nimdeɛ sua ne papayɛ.

⁴ Odwen amumɔyɛde ne kɛtɛ so, ɔde ne nan asi ɔkwan a enye so; bɔne de, onkyi.

⁵ AWURADE, w’adɔe kodu soro, na wo nokware kodu wim tɔnn.

⁶ Wo trenee te sɛ Onyankopɔn mmepɔw, w’atemmu te sɛ ebun a emu dɔ. AWURADE, wugye nnipa ne mmoa nkwa.

⁷ Onyankopɔn, w’adɔe no so dɛn ara! Na nnipa mma de wɔn ho dɔ wo ntaban nwini ase.

⁸ Wo fi mu srade meemee wɔn, na woma wɔnom w’anigye asubɔnten.

⁹ Efisɛ wo nkyɛn na nkwa nsuti wɔ, wo hann mu na yehu hann.

¹⁰ Ma w’adɔe nkyɛ mma wɔn a wonim wo, ne wo trenee mma koma mu teefo.

¹¹ Mma ɔhantanni nan nntia me, na mma abɔnefo nsa nnsum me!

¹² Ɛnne na amumɔyɛfo atotɔ, woasum wɔn ahwehwe fam a wontumi nsɔre.