Nnwom 35 - KYERƐW KRONKRON

Atamfo nti ɔhwehwɛ ɔboa

Dawid de

¹ AWURADE, wo ne wɔn a wɔne me ham no nham, wo ne wɔn a wɔne me ko no, nko!

² So ɔkyɛm ne nkataanim, na sɔre bɛboa me.

³ Twe peaw na siw wɔn a wɔtaa me no kwan, ka kyerɛ me kra sɛ: W’agyenkwa ne me!

⁴ Ma wɔn a wɔhwehwɛ me kra no anim ngu ase na wɔn ani nwu, ma wɔn a wɔpɛ me bɔne no mfa ahohora nsan wɔn akyi!

⁵ Ma wɔnyɛ sɛ ntɛtɛwa, mframa anim, na ma AWURADE bɔfo nsum wɔn ngu!

⁶ Ma wɔn akwan mu nnuru sum, na ɛnyɛ patoropatoro, na AWURADE bɔfo ntaa wɔn!

⁷ Na wɔasum me afiri wɔn amoam kwa, na wɔatu me kra amoa kwa.

⁸ Ma ɔsɛe mmefi wɔn aworaw, na ma n’afiri a wɔasum ahintaw no nyi wɔn, ma wɔmfa patabubu nhwe mu!

⁹ Na me kra bedi ahurusi AWURADE mu, na ne ho asan no, ne nkwagye mu.

¹⁰ Me nnompe nyinaa bɛka sɛ: AWURADE, hena na ɔte sɛ wo a wugye ɔmanehunufo nea ɔyɛ den sen no nsam, ne ɔmanehunufo ne ohiani fi ne dwowtwafo nsam.

¹¹ Adansefo nkontompofo sɔre; ade a minnim na wobisa me.

¹² Wɔde bɔne tua me papa ka, me kra ayɛ sɛ ayisaa.

¹³ Na me de, wɔyare a, mehyɛ atweaatam, mede mmuada mebrɛɛ me kra ase, na mebɔɔ mpae ma ɛsan beguu me kokom.

¹⁴ Meyɛe sɛnea ɔyɛ m’adamfo ne me nua, misii me ti ase twann sɛ obi a ɔregyam ne na.

¹⁵ Na sɛ merekɔhwe ase nti, wɔn ani gye na wɔbɔ tukuw, nkwahumafo ne nnipa a minnim wɔn bɔ me so tukuw, wɔyaw ara na wonnyae.

¹⁶ Sɛ asatofo pɛ nkyewa ho tena di fɛw no, wɔtwɛree wɔn se guu me so.

¹⁷ AWURADE, wobɛhwɛ ara akosi da bɛn? Gye me fi wɔn sɛe mu, ne me kra fi agyata nsam!

¹⁸ Mɛda wo ase, gua kɛse mu, meyi wo ayɛ, ɔman dodow mu.

¹⁹ Mma m’atamfo atorofo no ani nnnye me ho, mma wɔn a wɔtan me kwa no mmmu me anikyiw!

²⁰ Na wɔnka asomdwoesɛm, na wodwen nkontomposɛm hyɛ wɔn a wodwo, asase so.

²¹ Na wɔtɛɛ wɔn anom haharaa wɔ me so, wose: Wie, wiɛ, yɛn ani ahu!

²² AWURADE, woahu, mmua w’ano, AWURADE, mfi me nkyɛn nkɔ akyiri!

²³ Nyan, na sɔre bebu me atɛn, me Nyankopɔn ne m’AWURADE, bedi m’asɛm!

²⁴ AWURADE, me Nyankopɔn, fa wo trenee so bebu me atɛn, na mma wɔn ani nnnye me ho!

²⁵ Mma wɔnnka wɔn komam sɛ: Wiɛ, nea yɛpɛ ni! Mma wɔnnka sɛ: Yɛamene no.

²⁶ Wɔn a wɔn ani gye m’amanehunu ho nyinaa, ma wɔn ani nwu, na wɔn anim ngu ase. Wɔn a wodi me so akokurokosɛm no, ma aniwu ne ahohora nsi wɔn adurade!

²⁷ Wɔn a me trenee sɔ wɔn ani no, ma wonni ahurusi na wɔn ani nnye; ma wɔnka daa sɛ: Wɔnkamfo AWURADE kɛseyɛ, sɛ n’akoa yiyedi sɔ n’ani.

²⁸ Na me tɛkrɛma bɛka wo trenee ne w’ayeyi daa nyinaa.