Nnwom 33 - KYERƐW KRONKRON

Wiase sodi ho dwom

¹ Treneefo, momfa anigye nhuro AWURADE mu, ɛsɛ wɔn a wɔteɛ no sɛ woyi no ayɛ.

² Momfa sanku nna AWURADE ase, momfa sanku a ɛso hama du nto no dwom!

³ Monto dwom foforo mma no, mommɔ sanku yiye nka ɛnne ho!

⁴ Na AWURADE asɛm teɛ, na ne nnwuma nyinaa wɔ nokware mu.

⁵ Ɔdɔ asɛntrenee ne atemmu, AWURADE adɔe ahyɛ asase so ma.

⁶ AWURADE de n’asɛm na ɛyɛɛ ɔsoro, na ɔde n’anom honhom yɛɛ emu asafo nyinaa.

⁷ Ɔka po nsu boa ano kuw, ɔde ebun sie nea ɛhɔ dɔ.

⁸ Ma asase nyinaa sofo nsuro AWURADE, wɔn a wɔte wiase nyinaa mfɛre no;

⁹ na ɔno na ɔka a, ɛbamu, ɔno na ɔhyɛ a, egyina hɔ.

¹⁰ AWURADE ma amanaman agyina dan hunu, ɔma aman adwene yɛ ɔkwa.

¹¹ AWURADE agyina de, egyina hɔ daa, ne komam adwene wɔ hɔ ma awo ntoatoaso nyinaa.

¹² Nhyira ne nkurɔfo a wɔn Nyankopɔn ne AWURADE, ne ɔman a wapaw wɔn de ayɛ n’ankasa apɛgyade.

¹³ AWURADE fi soro hwɛ, ohu nnipa mma nyinaa.

¹⁴ Ɔte ne tenabea na ɔhwɛ asase sotefo nyinaa.

¹⁵ Ɔno na ɔnwene wɔn nyinaa koma, ohu wɔn nnwuma nyinaa mu.

¹⁶ Ɔhene biara mfa dɔm dodow nni nkonim, ɔkofo mfa n’ahoɔden kɛse nnye ne ho.

¹⁷ Nkwagye mu, ɔpɔnkɔ yɛ ade hunu, na wɔmfa n’ahoɔden dodow nnye onipa.

¹⁸ Hwɛ, AWURADE ani wɔ wɔn a wosuro no so, ɛwɔ wɔn a wɔn ani da n’adɔe so no so,

¹⁹ sɛ obegye wɔn kra afi wu mu, na wama wɔanya nkwa ɔkɔm mu.

²⁰ Yɛn kra twɛn AWURADE, yɛn boafo ne yɛn kyɛm ne no.

²¹ Na ne mu na yɛn koma bɛtɔ yɛn yam, efisɛ yɛde yɛn ho ato ne din kronkron so.

²² AWURADE, ma w’adɔe ntena yɛn so, sɛnea yɛn ani da wo so no.