Nnwom 27 - KYERƐW KRONKRON

AWURADE ne me hann ne me nkwagye

Dawid de

¹ AWURADE ne me hann ne me nkwagye, hena na minsuro no? AWURADE ne me nkwa ahoɔden, hena anim na me ho mpopo?

² Nnipa bɔne a wɔhyɛ me so na wɔtan me, sɛ wɔretoa me abɛsunsuane me a, wɔawatiwatiriw na wɔahwehwe ase.

³ Sɛ dɔm bɔ me ho nsra a, me koma rentu; sɛ wotu me so sa a, ɛno mu po na me ho tɔ me.

⁴ Ade biako na masrɛ AWURADE, ɛno na mɛhwehwɛ akyi kwan, sɛ me nna a midi nyinaa mɛtena AWURADE fi, na mahwɛ AWURADE animtew, na madwen me tirim, n’asɔrefi.

⁵ Na ɔkora me ne sese mu hiada, ɔde me hintaw ne ntamadan ahintawee, ɔma me so gyina ɔbotan so.

⁶ Na afei ɔbɛma me ti so, m’atamfo a wɔatwa me ho ahyia no so, na mabɔ ne ntamadan mu ayeyi afɔre, na mato AWURADE sanku dwom.

⁷ AWURADE, tie me sufrɛ; hu me mmɔbɔ, na gye me so.

⁸ Woaka sɛ: Monhwehwɛ m’anim nti, me koma se wo sɛ: AWURADE, w’anim na merehwehwɛ.

⁹ Nyi w’ani nhintaw me, mfa abufuw mpam w’akoa. Me boafo ne wo, ntow me nkyene, na nnyaw me, me nkwagye Nyankopɔn.

¹⁰ Na m’agya ne me na agyaw me, na AWURADE de, ogye me.

¹¹ AWURADE, kyerɛ me wo kwan, na fa me fa ɔtempɔn tamaa so, m’atɛwfo nti.

¹² Nnan me mma sɛ m’atamfo pɛ, na adansekurumfo asɔre ahyɛ me, ne wɔn a wɔpuw anuɔdensɛm.

¹³ Migye midi sɛ mehu AWURADE ayamye, ateasefo asase so.

¹⁴ Ma w’ani nna AWURADE so, hyɛ wo ho den na ma wo bo nyɛ duru, Yiw, ma w’ani nna AWURADE so.