Nnwom 25 - KYERƐW KRONKRON

Fakyɛ ne akwankyerɛ ho mpaebɔ

Dawid de

¹ AWURADE, wo na mema me kra so mekyerɛ wo.

² Me Nyankopɔn, wo so na mede me ho meto, mma m’ani nnwu, mma m’atamfo ho nnsɛpɛw wɔn, me nti.

³ Ampa ara, wɔn a wɔhwɛ wo kwan no biara ani renwu, wɔn a wotwa nkontompo kwa na wɔn ani bewu.

⁴ AWURADE, kyerɛ me w’akwan, na fa me fa w’atempɔn so.

⁵ Ma mennantew wo nokware mu, na kyerɛkyerɛ me, efisɛ wone me nkwagye Nyankopɔn, m’ani da wo so daa nyinaa.

⁶ AWURADE, kae wo mmɔborohunu ne w’adɔe, a ɛwɔ hɔ fi tete.

⁷ Nkae me mmofraase bɔne ne me mfomso, na mmom kae me sɛ w’adɔe te no, AWURADE, w’ayamye nti.

⁸ AWURADE ye, na ɔteɛ, enti na ɔkyerɛkyerɛ nnebɔneyɛfo ne kwan so.

⁹ Ɔma ahobrɛasefo nnantew trenee mu, na ɔma ahobrɛasefo sua ne kwan.

¹⁰ AWURADE atempɔn nyinaa yɛ adɔe ne nokware ma wɔn a wodi n’apam ne n’adansesɛm so.

¹¹ AWURADE, wo din nti fa me bɔne kyɛ me, na ɛdɔɔso pii.

¹² Onipa biara a osuro AWURADE no, ɔbɛkyerɛ no kwan a ɔmfa so.

¹³ Ne kra bɛtena yiyedi mu, na n’asefo anya asase atena so.

¹⁴ AWURADE yi ne tirim asɛm kyerɛ wɔn a wosuro no, na ɔma wohu n’apam no mu.

¹⁵ M’ani hwɛ AWURADE daa, na ɔno na obeyi me nan afi afiri mu.

¹⁶ Dan w’ani hwɛ me, na dom me, na meyɛ ankonam, na meyɛ mmɔbɔ.

¹⁷ Me koma mu ahohia dɔɔso pii, yi me fi m’ahokyere mu.

¹⁸ Hwɛ m’amane ne m’ahometew, na fa me bɔne nyinaa kyɛ me.

¹⁹ Hwɛ sɛ m’atamfo dɔɔso, na wɔde atirimɔden tan me.

²⁰ Hwɛ me kra so na gye me, mma m’ani nnwu, na miguan metoa wo.

²¹ Ma pɛyɛ ne teeyɛ nhwɛ me so, efisɛ m’ani da wo so.

²² Onyankopɔn, gye Israel fi wɔn ahohia nyinaa mu.