Nnwom 23 - KYERƐW KRONKRON

AWURADE ne guanhwɛfo pa

Dawid dwom

¹ AWURADE ne me hwɛfo, hwee renhia me.

² Ɔma meda adidibea a ɛhɔ nwura yɛ frɔmfrɔm, ogya me kɔ nsu a ɛho dwo ho.

³ Odwudwo me kra, ɔde me fa akwantrenee so, ne din nti.

⁴ Sɛ mpo menam owu sum kabii bon mu a, minsuro bɔne bi, efisɛ wo ne me na ɛwɔ hɔ, w’abaa ne wo poma na ɛkyekye me werɛ.

⁵ Wotow me pon m’atamfo anim, wode ngo fɔw me tirim, me kuruwa yɛ ma bu so.

⁶ Ampa ara yiye ne adɔe nko na ebedi m’akyi me nkwa nna nyinaa, na mɛtena AWURADE fi daa.