Nnwom 18 - KYERƐW KRONKRON

Nkonim dwom Ɔkae sɛ:

Wɔde ma dwonkyerɛfo. AWURADE akoa Dawid de. Ɔkaa dwom yi nsɛm kyerɛɛ AWURADE, da a AWURADE gyee no n’atamfo nyinaa ne Saulo nsam no.

¹ Ao, AWURADE, m’ahoɔden, medɔ wo.

² AWURADE ne me botan ne m’abankɛse ne me gyefo, me Nyankopɔn ne me botantim a meguan kɔtoa no, me kyɛm ne me nkwagye abɛn, m’aban dennen.

³ Misu mefrɛɛ, AWURADE, ɔno a ɔfata sɛ wɔyi n'ayɛ, na wɔagye me m’atamfo nsam.

⁴ Owu nhama bobaree me ho, na ɔsɛe bɛtoo me sɛ osuhweam

⁵ Asamando nhama twaa me ho kɔntɔnkrɔn, owu afiri behyiaa me.

⁶ M’ahoyeraw mu misu mefrɛɛ AWURADE, Nyankopɔn na meteɛɛm mefrɛɛ no. Ɔtee me nne n’asɔrefi, na me su a misui n’anim no koduu n’asom.

⁷ Ɛnna asase hinhimii, na ɛwosowee, na mmepɔw nnyinaso popoe, na ehinhimii, efisɛ ne bo ahuru.

⁸ Owusiw tu fii ne hwenem, na ogya a ɛhyew ade fii n’anom, nyansrama fii ne mu dɛwee.

⁹ Na okuntun ɔsoro mu, na osii fam, na sum kabii wɔ ne nan ase.

¹⁰ Na ɔtenaa Kerub so tui, na ɔde mframa ntaban tu bae afrɛso.

¹¹ Ɔde sum kataa ne ho hyiae, n'asasewa yɛ osu a amuna kusuu.

¹² Hann a edi n’anim no nyansrama fii, ne mununkum no mu bae.

¹³ Na AWURADE boom ɔsoro, na ɔsorosoroni no ma wɔtee ne nne, amparuwbo ne nnyansramma.

¹⁴ Na ɔtotow n’agyan de bɔɔ wɔn hwetee, ne anyinam de tanee wɔn ani.

¹⁵ Ɛnna ɛpo mu mmonka yiyii adi, na wiase nnyinaso ho daa hɔ, efi w’ateɛteɛ, AWURADE, ne wo hwene mu home hahyeehahyee no.

¹⁶ Ɔteɛɛ ne nsa fi soro bɛfaa me, ɔtwee me fii nsu pii mu.

¹⁷ Ogyee me fii me tamfo hoɔdenfo ne wɔn a wokyi me no nsam, efisɛ wɔsen me ahoɔden.

¹⁸ Wɔbɛtoaa me m’amanehunu da mu, na AWURADE bɛyɛɛ me okyitaafo.

¹⁹ Na oyii me kogyinaa nea ɛhɔ trɛw, ogyee me, efisɛ mesɔɔ n’ani.

²⁰ AWURADE tuaa me ka sɛ me trenee te, sɛ me nsa ho si tew no na otuaa me ho ka maa me.

²¹ Na manantew AWURADE akwan so, na memfaa bɔne kwan bi so minnyaw me Nyankopɔn,

²² na mmom n’atemmude nyinaa wɔ m’ani so, na mimfii n’ahyɛde ho ɛ.

²³ Na me ho nni asɛm bi wɔ n’anim, na mehwɛɛ me ho so mifii amumɔyɛ ho.

²⁴ Na AWURADE atua me ka sɛnea me trenee te, sɛ me nsa ho a afi wɔ n’ani so no te.

²⁵ Ɔnokwafo na wo ne no bedi no nokwarem, onipa a odi mu na wo ne no bedi no mudi so.

²⁶ Nea ɔtew ne ho na wobɛtew wo ho akyerɛ no, na ɔkɔntɔnkyefo de, wukyinkyim wo ho kyerɛ no.

²⁷ Na wo na wugye ahobrɛasefo, na wobrɛ ahantanfo ase.

²⁸ Na wo na woma me kanea dɛw, AWURADE me Nyankopɔn, hyerɛn me sum mu.

²⁹ Na wo na mede wo metow mehyɛ ɛdɔm so, na mede me Nyankopɔn mihuruw metra ɔfasu.

³⁰ Na Onyankopɔn yi de, ne kwan yɛ pɛpɛ, AWURADE asɛm mu tew, ɔyɛ ɔkyɛm ma wɔn a woguan toa no nyinaa.

³¹ Na hena ne Nyankopɔn sɛ AWURADE nko, na hena na ɔyɛ ɔbotan sɛ yɛn Nyankopɔn?

³² Onyankopɔn a ɔde ahoɔden bɔɔ m’asen, na ɔma me kwan yɛ pɛpɛɛpɛ.

³³ Ɔyɛ m’anan sɛ aforotebere de, na ɔde me gyina me srɔnsrɔnmmea so.

³⁴ Ɔkyerɛ me nsa akodi, na ɔma me basa kuntun kɔbere tadua mu.

³⁵ Na woama me wo nkwagye kyɛm, na wo nsa nifa soo me mu, na wo mmoa maa meyɛɛ kɛse.

³⁶ Wotrɛw m’anammɔn mu m’ase, na m’anan anwatiri.

³⁷ Mitiw m’atamfo, na metoo wɔn, na mansan de kosii sɛ miwiee wɔn kum.

³⁸ Mebobɔɔ wɔn, na wɔantumi ansɔre, wɔtotɔe me nan ase.

³⁹ Na wode ahoɔden bɔɔ m'asen maa akodi, wobrɛɛ wɔn a wɔsɔre hyɛɛ me no ase hyɛɛ m’ase,

⁴⁰ na womaa m’atamfo dan wɔn akyi kyerɛɛ me, na wɔn a wokyi me no, mesɛee wɔn.

⁴¹ Wosu frɛe, na ogyefo bi nni hɔ, wɔfrɛɛ AWURADE, nanso wammua wɔn.

⁴² Na mepɛtɛw wɔn meyɛɛ wɔn sɛ mfuturu, mframa anim, mesesaw wɔn migui sɛ mmorɔn so dɔte.

⁴³ Wuyii me ne nnipa m’aperedi mu, wode me sii amanaman so ti; ɔman a minnim wɔn na ɛsom me.

⁴⁴ Aso tee ara pɛ na wotiee me, ananafo brɛɛ wɔn ho ase maa me.

⁴⁵ Ananafo twintwamee, na wɔde ahopopo fifii wɔn hintabea bae.

⁴⁶ AWURADE te ase, na nhyira ne me botantim no. Na me nkwagye Nyankopɔn no, wɔmma no so.

⁴⁷ Onyankopɔn a odii were maa me, na ɔde aman hyɛɛ m’ase,

⁴⁸ wagye me afi m’atamfo mu, yiw, woama me so afi wɔn a wɔsɔre hyɛɛ me no mu, woagye me awerɛmfo nsam.

⁴⁹ Enti, AWURADE, mɛda wo ase amanaman mu, na mabɔ wo din mato ayeyi nnwom,

⁵⁰ sɛ wone nea ɔma ne hene nkwagye so, na ɔyɛ nea wasra no no adɔe, Dawid ne n’asefo daa.