Nnwom 149 - KYERƐW KRONKRON

Sion, yi AWURADE ayɛ!

¹ Munyi AWURADE ayɛ! Monto dwom foforo mma AWURADE, monka n’ayeyi, ahotefo asafo mu.

² Ma Israel ani nnye ne yɛfo ho, ma Sion mma nni wɔn hene ho ahurusi.

³ Ma wɔmfa asaw nyi ne din ayɛ, ma wɔmfa mpintin ne asanku nto dwom mma no.

⁴ Na AWURADE ani sɔ ne man, ɔde nkwagye hyehyɛ ahobrɛasefo.

⁵ Ahotefo hyehye wɔn ho anuonyam mu, wɔto ahosan dwom, wɔn nnae so.

⁶ Onyankopɔn ayeyi a ɛso wɔ wɔn anom, na nkrante anofanu hyɛ wɔn nsam,

⁷ sɛ wobedi amanaman mu were, na wɔatwe aman aso;

⁸ sɛ wɔde nkɔnsɔnkɔnsɔn bɛkyere wɔn ahene, na wɔde dade mpokyerɛ agu wɔn atitiriw;

⁹ sɛ wɔde atɛn a wɔakyerɛw no bebu wɔn: Eyi yɛ n’ahotefo nyinaa anuonyam. Munyi AWURADE ayɛ!