Nnwom 145 - KYERƐW KRONKRON

Onyankopɔn kɛseyɛ ne n’adɔe

Dawid ayeyi dwom

¹ Mema wo so, me Nyankopɔn, ɔhene, na mehyira wo din daa daa.

² Mehyira wo daa nyinaa, na meyi wo din ayɛ daa daa.

³ AWURADE so, na ɔsɛ ayeyi kɛse, ne kɛseyɛ mu nni hwehwɛbea.

⁴ Awo ntoatoaso kamfo wo nnwuma kyerɛ awo ntoatoaso foforo, na wɔka wo mmaninne.

⁵ Medwen w’anuonyam a ɛharan no kɛseyɛ ne w’anwonwade no ho.

⁶ Na wɔka wo nneyɛe a ɛyɛ hu no tumi ho asɛm, na mɛka wo kɛseyɛ makyerɛ.

⁷ Wɔworo wo papayɛ bebrebe no nkae, na wɔto wo trenee ho ahurusi dwom.

⁸ AWURADE yɛ ɔdomfo ne mmɔborohunufo, abufuwyɛ mu nyaa ne adɔeyɛ mu kɛse.

⁹ AWURADE ye ma nnipa nyinaa, na ne mmɔborohunu wɔ ne nnwuma nyinaa so.

¹⁰ AWURADE, wo nnwuma nyinaa da wo ase, na w’ahotefo hyira wo.

¹¹ Wɔka w’ahenni anuonyam, na wɔbɔ wo mmaninyɛ din,

¹² sɛ wɔbɛma nnipa mma ahu ne mmaninne ne n’ahenni anuonyam a ɛharan no.

¹³ W’ahenni yɛ daa ahenni, na wo tumidi fa awo ntoatoaso nyinaa mu.

¹⁴ AWURADE wowaw wɔn a wɔhwe ase nyinaa, na ɔma wɔn a wɔakotow nyinaa so gyina.

¹⁵ Aniwa nyinaa hwɛ wo kwan, na woma wɔn wɔn aduan, ne bere mu.

¹⁶ Wubue wo nsam, na woma ateasefo nyinaa nya nea wɔpɛ di mee.

¹⁷ AWURADE teɛ, n’akwan nyinaa mu, na ɔyɛ adɔe ne nnwuma nyinaa mu.

¹⁸ AWURADE bɛn wɔn a wɔfrɛ no nyinaa, wɔn a wɔfrɛ no nokware mu nyinaa.

¹⁹ Ɔyɛ nea n’afɛrefo pɛ ma wɔn, na otie wɔn sufrɛ, na ogye wɔn.

²⁰ AWURADE hwɛ n’adɔfo nyinaa so, na abɔnefo nyinaa de, ɔbɛsɛe wɔn.

²¹ M’ano bɛka AWURADE ayeyi, na ma ɔhonam nyinaa nhyira ne din kronkron daa daa.