Nnwom 136 - KYERƐW KRONKRON

Onyankopɔn anuonyam wɔ abɔde ne abakɔsɛm mu

¹ Monna AWURADE ase, na oye, na n’adɔe wɔ hɔ daa.

² O, Monna anyame mu Nyankopɔn ase, na n’adɔe wɔ hɔ daa.

³ O, Monna awuranom mu owura no ase, na n’adɔe wɔ hɔ daa.

⁴ Nea ne nko yɛ anwonwade akɛse, na n’adɔe wɔ hɔ daa.

⁵ Nea ɔde nhumu yɛɛ ɔsoro no, na n’adɔe wɔ hɔ daa.

⁶ Nea ɔde asase trɛw nsu so no, na n’adɔe wɔ hɔ daa.

⁷ Nea ɔyɛɛ akanea akɛse, na n’adɔe wɔ hɔ daa.

⁸ Owia, sɛ enni adekyee so, na n’adɔe wɔ hɔ daa.

⁹ Ɔsram ne nsoromma, sɛ enni anadwo so, na n’adɔe wɔ hɔ daa.

¹⁰ Nea ɔbobɔɔ Misraimfo, mmakan no, na n’adɔe wɔ hɔ daa.

¹¹ Na oyii Israel fii wɔn mu no, na n’adɔe wɔ hɔ daa.

¹² Ɔde nsa a ɛyɛ den ne basa a wateɛm na eyii wɔn, na n’adɔe wɔ hɔ daa.

¹³ Nea otwitwaa mmɛw po mu asinasin, na n’adɔe wɔ hɔ daa.

¹⁴ Na ɔde Israel faa mu, na n’adɔe wɔ hɔ daa.

¹⁵ Na ɔkaa Farao ne ne dɔm guu mmɛw po mu, na n’adɔe wɔ hɔ daa.

¹⁶ Nea ogyaa ne man sare so, na n’adɔe wɔ hɔ daa.

¹⁷ Nea ɔbobɔɔ ahemfo akɛse, na n’adɔe wɔ hɔ daa.

¹⁸ Na okunkum ahene anuonyamfo, na n’adɔe wɔ hɔ daa.

¹⁹ Amorifo hene Sihon, na n’adɔe wɔ hɔ daa.

²⁰ Ne Basan hene Og, na n’adɔe wɔ hɔ daa.

²¹ Na ɔde wɔn asase mae sɛ agyapade, na n’adɔe wɔ hɔ daa.

²² Ɔde yɛɛ n’akoa Israel agyapade, na n’adɔe wɔ hɔ daa.

²³ Nea ɔkaee yɛn yɛn ahobrɛase mu, na n’adɔe wɔ hɔ daa.

²⁴ Na ogyee yɛn fii yɛn ahohiafo nsam, na n’adɔe wɔ hɔ daa.

²⁵ Ɔma ɔhonam nyinaa aduan, na n’adɔe wɔ hɔ daa.

²⁶ O, Monna ɔsoro Nyankopɔn ase, na n’adɔe wɔ hɔ daa.