Nnwom 107 - KYERƐW KRONKRON

NHOMA A ƐTO SO ANUM ( Nnwom 107—150 ) Wɔn a wɔagye wɔn nkwa no aseda dwom

¹ Monna AWURADE ase, na oye, na n’adɔe wɔ hɔ daa.

² Ma wɔn a AWURADE agye wɔn nka sa, wɔn a wagye wɔn afi ɔhohiafo nsam,

³ na waboaboa wɔn ano afi nsaase so, afi apuei ne atɔe, afi atifi fam ne anafo fam.

⁴ Wokyinkyinii sare so, nkyerekyerewa a ɛso nni kwan so, wɔanhu kurow bi antena mu.

⁵ Ɔkɔm dee wɔn, osukɔm dee wɔn, wɔn kra tɔɔ piti.

⁶ Na wosu frɛɛ AWURADE, wɔn ahohia mu, na ogyee wɔn fii wɔn ahokyere mu,

⁷ na ɔde wɔn faa ɔkwantrenee so sɛ wɔnkɔ kurow a wobetumi atena mu so.

⁸ Wɔnkamfo AWURADE, n’adɔe ho, ne n’anwonwade, nnipa mma mu,

⁹ sɛ wama ɔkra a ne ho ayow amee, na ɔde adepa ahyɛ ɔkra a ɔkɔm de no ma.

¹⁰ Wɔn a wɔtenaa sum ne sum kabii mu, na wɔkyeree wɔn guu amane ne dade [nkɔnsɔnkɔnsɔn] mu,

¹¹ efisɛ wɔtew Onyankopɔn nsɛm ho atua, na wɔtew ɔsorosoroni no agyina ahi,

¹² na ɔde ɔhaw brɛɛ wɔn koma ase, wɔhwehwee ase a ɔboafo bi nni hɔ.

¹³ Na wosu frɛɛ AWURADE, wɔn ahohia mu, na ogyee wɔn fii wɔn ahokyere mu.

¹⁴ Oyii wɔn fii sum ne sum kabii mu, na obubuu wɔn mpokyerɛ mu.

¹⁵ Wɔnkamfo AWURADE, n’adɔe ho, ne n’anwonwade, nnipa mma mu,

¹⁶ sɛ wabubu kɔbere apon, na watwitwa adaban mu asinasin.

¹⁷ Agyennyentwi, wɔn mmarato kwan ne wɔn amumɔyɛ nti wohuu amane.

¹⁸ Wɔn kra kyi aduan nyinaa, na wɔbɛn owu abobow ano.

¹⁹ Na wosu frɛɛ AWURADE, wɔn ahohia mu, na ogyee wɔn fii wɔn ahokyere mu.

²⁰ Ɔmaa n’asɛm bɛsaa wɔn yare, na oyii wɔn fii wɔn amoa mu.

²¹ Wɔnkamfo AWURADE, n’adɔe ho, ne n’anwonwade, nnipa mma mu,

²² na wɔmmɔ aseda afɔre, na wɔmfa ahurusi dwom nka ne nneyɛe.

²³ Wɔn a wosian kɔɔ po so ahyɛn mu na wokodii nsu akɛse mu dwuma no,

²⁴ wɔn na wohuu AWURADE nneyɛe, ne n’anwonwade ebun mu,

²⁵ na ɔka maa ahum kɛse tui, na ɛmaa n’asorɔkye so.

²⁶ Wɔforo kɔɔ soro, na wosian kɔɔ bun donkudonku mu, ahohia nti wɔn kra hodwowee.

²⁷ Wokyim kɔ bae tɔɔ ntintan sɛ ɔsabofo, na wɔn nyansa nyinaa sae wɔn tirim.

²⁸ Na wosu frɛɛ AWURADE, wɔn ahohia mu, na ogyee wɔn fii wɔn ahokyere mu.

²⁹ Ɔmaa ahum no yɛɛ komm, na asorɔkye no yɛɛ konii.

³⁰ Na wɔn ani gyei sɛ ano adwo komm, na ɔde wɔn kɔɔ wɔn agyinae a wɔhwehwɛ no:

³¹ Wɔnkamfo AWURADE, n’adɔe ho, ne n’anwonwade nnipa mma mu,

³² na wɔmma no so, ɔman ahyiae mu, na wonyi no ayɛ, mpanyimfo guabɔ mu.

³³ Ɔdan asuten ma ɛyɛ sare, ne nsuaniwa ma ɛyɛ nkyerekyerewa.

³⁴ Asase a ɛba aduan dan asase kesee, wɔn a wɔte so no bɔneyɛ nti.

³⁵ Ɔdan sare ma ɛyɛ ɔtare, ne nkyerekyerewa ma ɛyɛ nsu aniwa,

³⁶ na ɔmaa wɔn a ɔkɔm de wɔn kɔtenaa hɔ, na wɔkyekyee kurow tenaa mu,

³⁷ na wɔyɛɛ mfuw, na wɔtetɛw bobe nturo, na wonyaa nnɔbae pii.

³⁸ Na ohyiraa wɔn maa wɔn ase fɛee bebree, na wamma wɔn afieboa so anhuan.

³⁹ Afei wɔn so huanee, na wɔbrɛɛ wɔn ase, efi nhyɛso, ɔhaw ne awerɛhowhyɛ.

⁴⁰ Ɔde animtiaabu gu mmapɔmma so, na ɔma wokyini asase fo a ɔkwan nni hɔ so.

⁴¹ Na ɔmaa ohiani so fii amanehunu mu, na ɔyɛɛ wɔn mmusua sɛ nguankuw.

⁴² Treneefo behu na wɔn ani agye, na amumɔyɛ nyinaa bemua n’ano.

⁴³ Obiara a ɔyɛ onyansafo no, ma ommu eyinom, na ma wonnya AWURADE adɔe mu ahuye.