Nnwom 106 - KYERƐW KRONKRON

Onyankopɔn adɔe ne Israel bonniayɛ

¹ Munyi AWURADE ayɛ! Monna AWURADE ase, na oye, na n’adɔe wɔ hɔ daa.

² Hena na obetumi aka AWURADE mmaninne, na wama wɔate n’ayeyi nyinaa?

³ Nhyira ne wɔn a wokura atemmu mu, ne nea odi asɛntrenee daa nyinaa.

⁴ AWURADE, wo man ho anisɔ no mu, kae me, wo nkwagye mu, bɛhwɛ me,

⁵ na minhu wɔn a woapaw wɔn no yiyedi, na m’ani nnye wo nkurɔfo no anigye ho bi, na me ne w’agyapade nhyehye yɛn ho.

⁶ Yɛne yɛn agyanom ayɛ bɔne, yɛafom, yɛayɛ bɔne kɛse.

⁷ Yɛn agyanom anhu w’anwonwade Misraim, wɔankae w’adɔe dodow no, na wɔtew atua ɛpo ho, mmɛw po ho.

⁸ Nanso ne din nti ogyee wɔn, sɛ ɔbɛma wɔahu ne mmaninyɛ.

⁹ Ɔteɛteɛɛ mmɛw po no ma ɛyowee, na ɔde wɔn faa abun mu sɛ sare so.

¹⁰ Na ogyee wɔn fii nea okyi wɔn no nsam, na oyii wɔn fii ɔtamfo nsam,

¹¹ na nsu kataa wɔn ahohiafo so, wɔn mu biako po anka.

¹² Ɛnna wogyee ne nsɛm dii, wɔtoo n’ayeyi dwom.

¹³ Wɔn werɛ fii ne nneyɛe ntɛm, wɔantwɛn n’agyinatu.

¹⁴ Na wɔn kɔn dɔe ntraso sare so, na wɔsɔɔ Onyankopɔn hwɛe nkyerekyerewa so.

¹⁵ Ɛnna ɔmaa wɔn nea wobisae, nanso ɔmaa ɔfɔn baa wɔn kra mu.

¹⁶ Na wɔn ani beree Mose, nsra no mu, ne Aaron, AWURADE hotefo no.

¹⁷ Asase bue menee Datan, na ɛkataa Abiram asafo so.

¹⁸ Na ogya sɔ kɔkaa wɔn asafo, ogyaframa taforoo abɔnefo no.

¹⁹ Wɔyɛɛ nantwi ba Horeb, na wɔkotow ohoni a wogui.

²⁰ Na wɔsakraa wɔn anuonyam yɛɛ no nantwi a ɔwe wura sɛso.

²¹ Wɔn werɛ fii Nyankopɔn a ogyee wɔn, na ɔyɛɛ nneɛma akɛse Misraim,

²² na ɔyɛɛ anwonwade, Ham asase so, ne ahude, mmɛw po ho no.

²³ Na ose anka ɔbɛsɛe wɔn, nanso Mose a oyii no no kogyinaa n’anim siw abu no ano, sɛ ɔrepam n’abufuw no, na wansɛe wɔn.

²⁴ Na wɔtoo asase a eye no ho mpe, wɔannye n’asɛm anni.

²⁵ Wonwiinwii wɔn ntamadan mu, na wɔantie AWURADE asɛm.

²⁶ Ɛnna ɔmaa ne nsa so hyɛɛ wɔn sɛ ɔbɛma wɔatotɔ sare so,

²⁷ na wabɔ wɔn asefo agu amanaman mu, na wapansam wɔn, nsaase so.

²⁸ Na wɔde wɔn ho bɔɔ Baal-peor ho, na wodii adefunu afɔrebɔde,

²⁹ na wɔde wɔn nneyɛe yii no ahii, na owuyare baa wɔn mu.

³⁰ Na Pinehas sɔre gyina patae, na osoo owuyare no ano.

³¹ Na wobuu eyi trenee maa no kɔɔ mma mma so kosi daa.

³² Na woyii no abufuw, Meriba nsu no so, na wɔn nti ewiee Mose bɔne.

³³ Na wɔhow ne honhom werɛ, na ɔde n’ano woroo nsɛm.

³⁴ Wɔankunkum aman a AWURADE kaa wɔn ho asɛm no,

³⁵ na wɔfrafraa amanaman no mu, na wosuasuaa wɔn nneyɛe.

³⁶ Na wɔsom wɔn ahoni, na ɛdan wɔn afiri.

³⁷ Na wɔde wɔn mmabanin ne wɔn mmabea bobɔɔ afɔre maa abosom,

³⁸ na wɔkaa mogya a enni fɔ gui, wɔn mmabanin ne wɔn mmabea mogya, wɔde wɔn bɔɔ afɔre maa Kanaan ahoni, ma mogya guu asase no ho fi.

³⁹ Na wɔde wɔn nneyɛe maa wɔn ho yɛɛ nwini, na wɔde wɔn nsɛnnii dan nguaman.

⁴⁰ Ɛnna AWURADE abufuw dɛw hyɛɛ ne man, na okyii n’agyapade.

⁴¹ Na ɔde wɔn hyɛɛ amanaman nsa, na wɔn a wokyi wɔn dii wɔn so.

⁴² Na wɔn atamfo hyɛɛ wɔn so, na wɔbrɛɛ wɔn ase hyɛɛ wɔn nsa ase.

⁴³ Ogyee wɔn mpɛn pii, na wɔn de, wɔyɛɛ mpi tew atua, na wɔbrɛɛ wɔn ase wɔn amumɔyɛ mu.

⁴⁴ Nanso ɔhwɛɛ wɔn ahohia maa wɔn, otiee wɔn nkɔmmɔdi no.

⁴⁵ Na ɔkaee n’apam maa wɔn, na n’adɔe dodow nti ɔyɛɛ timmɔbɔ.

⁴⁶ Na ɔmaa wɔn a wɔfaa wɔn nnommum nyinaa huu wɔn mmɔbɔ.

⁴⁷ Gye yɛn nkwa, AWURADE, yɛn Nyankopɔn, na boaboa yɛn ano fi amanaman mu, na yɛnna wo din kronkron no ase, na yɛmfa w’ayeyi nhyehye yɛn ho.

⁴⁸ Nhyira ne AWURADE, Israel Nyankopɔn fi daapem kosi daapem, na ma ɔman mu no nyinaa nse sɛ: Amen. Munyi AWURADE ayɛ!