Nnwom 105 - KYERƐW KRONKRON

Ade a Onyankopɔn yɛe Israel nkwagye ho

¹ Monna AWURADE ase, mommɔ ne din, momma wonhu ne nneyɛe, aman mu.

² Monto dwom mma no, monto ayeyi dwom mma no, munnwen n’anwonwade nyinaa ho nka.

³ Momfa ne din kronkron nhyehye mo ho, wɔn a wɔhwehwɛ AWURADE no koma ntɔ wɔn yam.

⁴ Mompɛ AWURADE ne ne tumi akyi kwan, monhwehwɛ n’anim daa yi.

⁵ Monkae n’anwonwade a wayɛ, n’ahodwiriwde ne n’anom atemmusɛm no,

⁶ mo, n’akoa Abraham asefo, Yakob a oyii no no mma.

⁷ Ɔno ne AWURADE yɛn Nyankopɔn, n’atemmu fa asase nyinaa so.

⁸ Ɔkae n’apam no de kosi daa, asɛm a ɔhyɛ maa awo ntoatoaso apem no,

⁹ apam a ɔne Abraham pamee, ne ne ntam a ɔkaa Isak no,

¹⁰ na ɔde sii hɔ maa Yakob sɛ ahyɛde, na ɔde maa Israel sɛ daa apam no,

¹¹ sɛ: Wo na mede Kanaan asase mɛma wo sɛ mo agyapade a wɔkyɛ no hama so.

¹² Ɛbere a nnipa no ano nnɔɔso, wɔyɛ kakraa bi ne ahɔho wɔ hɔ,

¹³ na wɔnenam fi ɔman mu kɔ ɔman mu, wofi ahenni bi mu kɔ ɔman foforo bi mu no,

¹⁴ wamma obi kwan sɛ ɔnhom wɔn so, na wɔn nti ɔkaa ahene anim sɛ:

¹⁵ Monnka me nnipa a wɔasra wɔn no, na monnyɛ m’adiyifo bɔne bi.

¹⁶ Na ɔmaa ɔkɔm baa asase no so, obubuu aduan poma nyinaa mu.

¹⁷ Ɔsomaa onipa bi dii wɔn anim, wɔtɔn Yosef ma ɔkɔyɛɛ akoa.

¹⁸ Wɔde mpokyerɛ miaa ne nan, de no too dade [nkɔnsɔnkɔnsɔn] mu,

¹⁹ kosii bere a n’asɛm baa mu, AWURADE asɛm sɔɔ no hwɛe.

²⁰ Ɔhene soma ma wokotuu no, nea odi aman so no ma wɔkɔsan no.

²¹ Ɔde no sii ne fi so panyin, ne nea ɔwɔ nyinaa sodifo,

²² sɛ ɔnkyerɛ n’asafohene nea ɔpɛ, na ɔnkyerɛ ne mpanyimfo nyansa.

²³ Ɛnna Israel baa Misraim, na Yakob bɛsoɛɛ Ham asase so hɔho.

²⁴ Na ɔmaa ne man ase fɛee bebree, na ɔma wɔyɛɛ den sen wɔn ahohiafo.

²⁵ Ɔdan wɔn koma sɛ wɔntan ne man, na wɔmfa anifere nhyɛ ne nkoa so.

²⁶ Ɔsomaa n’akoa Mose ne Aaron a oyii no no.

²⁷ Woyii ne nsɛnkyerɛnne sii wɔn mu, ne anwonwade, Ham asase so.

²⁸ Ɔmaa sum bedurui, nanso wɔannwen ne nsɛm ho.

²⁹ Ɔdannan wɔn nsu mogya, na ɔde kum wɔn mpataa.

³⁰ Wɔn asase dɔɔ mponkyerɛn manyamanya ma wɔbaa wɔn ahene mpia mu.

³¹ Ɔkae, na atɛn bae, ntontom baa wɔn asase nyinaa so.

³² Ɔde amparuwbo yɛɛ wɔn sutɔ ma ogyaframa baa wɔn asase so.

³³ Na ɔbobɔɔ wɔn bobe ne wɔn borɔdɔma, na obubuu wɔn asase so nnua.

³⁴ Ɔkae, na mmoadabi, ne mmɛbɛw a wɔn dodow nni ano, bae

³⁵ na wobedii wɔn asase so ahaban nyinaa, na wodii wɔn mfuw so aduan.

³⁶ Na ɔbobɔɔ wɔn asase so mmakan nyinaa, wɔn ahoɔden nyinaa mma a edi kan.

³⁷ Na ɔde wɔn ne dwetɛ ne sika fi kɔe, na mmerɛwni bi nni ne mmusuakuw mu.

³⁸ Wɔn adifi yɛɛ Misraimfo anigye, na wɔn ho hu tɔɔ wɔn so.

³⁹ Ɔtrɛw omununkum mu yɛɛ nkataso, ne ogya, sɛ ɛnyɛ hann anadwo.

⁴⁰ Wobisae, na ɔde mmoko bae, na ɔde ɔsoro aduan ma wɔmee.

⁴¹ Obuee ɔbotan maa nsu tuei, ɛteɛɛ wɔ nkyerekyerewa so sɛ asubɔnten.

⁴² Na ɔkaee n’asɛm kronkron no, ɔkaee n’akoa Abraham,

⁴³ na oyii ne man ma wɔde abotɔyam fii adi, ɔmaa wɔn a ɔpaw wɔn no de ahurusi kɔe.

⁴⁴ Na ɔde amanaman nsaase maa wɔn, na wodii nkurɔfo adwuma so ade,

⁴⁵ sɛ wɔnhwɛ n’ahyɛde nyɛ, na wonni ne mmara so. Munyi AWURADE ayɛ!