Nnwom 103 - KYERƐW KRONKRON

Me kra, hyira AWURADE!

Dawid de

¹ Me kra, hyira AWURADE, na me mu ade nyinaa nhyira ne din kronkron.

² Me kra, hyira AWURADE, na mma wo werɛ mmfi ne nneyɛe pa nyinaa.

³ Ɔno na ɔde wo mfomso nyinaa kyɛ wo, na ɔsa wo nyarewa nyinaa.

⁴ Ogye wo nkwa fi amena mu, ɔde adɔe ne mmɔborohunu bɔ wo abotiri.

⁵ Ɔde adepa hyɛ w’afono ma ma wo mmerantebere yɛ foforo sɛ ɔkɔre.

⁶ AWURADE di asɛntrenee, na obu atɛn gye wɔn a wɔhyɛ wɔn so nyinaa.

⁷ Ɔde n’akwan kyerɛɛ Mose, ɔmaa Israel mma huu ne nneyɛe.

⁸ Mmɔborohunufo ne ɔdomfo ne AWURADE, ne bo kyɛ fuw, na n’adɔe dɔɔso.

⁹ Ɔrenham nkosi daapem, na ɔrennya yɛn menasepɔw nkosi daa.

¹⁰ Onsusuw yɛn bɔne so ne yɛn nni, na ɔnhwɛ yɛn mfomso nhyɛ yɛn ananmu.

¹¹ Na sɛ ɔsoro ware sen asase no, sɛ n’adɔe so, wɔn a wosuro no so ne no.

¹² Sɛ Apuei ne Atɔe ntam ware no, sɛ wama yɛn ne yɛn mmarato ntam aware ne no.

¹³ Sɛ agya yam hyehye no mma ho no, sɛ AWURADE yam yɛ no wɔn a wosuro no ho ne no.

¹⁴ Na onim yɛn su, ɔkae sɛ yɛyɛ mfutuma.

¹⁵ Ɔdesani de, ne nna te sɛ sare, ɔyɛ frɔmm sɛ wuram nhwiren.

¹⁶ Sɛ mframa bɔ fa no so a, na onni hɔ, na ne sibea nnim no bio.

¹⁷ Na AWURADE adɔe fi daa kɔ daa, wɔn a wosuro no so, na ne trenee wɔ hɔ ma mma mma,

¹⁸ ma wɔn a wodi n’apam so, na wɔkae n’ahyɛde sɛ wɔbɛyɛ.

¹⁹ AWURADE de n’agua asi soro, na n’ahenni di ade nyinaa so.

²⁰ AWURADE abɔfo, munhyira no, ahoɔdenfo a mudi n’asɛm so na mutie ne kasa no.

²¹ AWURADE asafo nyinaa, munhyira no, n’asomfo a moyɛ nea ɛsɔ n’ani no.

²² AWURADE nnwuma nyinaa, munhyira no, mmeaemmeae a odi tumi nyinaa. Me kra, hyira AWURADE.