Nnwom 102 - KYERƐW KRONKRON

Nkɔmmɔdi ne anidaso

Mmɔboroni a ne home tew no a oyi ne nkɔmmɔ gu AWURADE anim no mpaebɔ

¹ AWURADE, tie me mpaebɔ, na ma me sufrɛ nnu w’anim.

² Nyi w’anim nhintaw me, da a me ho hia me no, brɛ w’aso ase ma me, da a misu mefrɛ no, yɛ ntɛm gye me so.

³ Na me nna hi sɛ owusiw, na me nnompe adɔ sɛ muka.

⁴ Me koma abow na akisa sɛ fan, na m’ani apa m’aduan di so.

⁵ M’apinisi nne nti me nnompe afomfam me werem.

⁶ Mete sɛ sare so pokupoku, mayɛ sɛ amamfo so patu.

⁷ Misi pɛ, mete sɛ akasanoma a ne nko si ɔdan atifi.

⁸ Daa adesae na m’atamfo bɔ me ahohora, wɔn a wɔbɔ me so dam de me yɛ ntanka.

⁹ Na madi nso sɛ aduan, na mede osu mafra m’anonne mu.

¹⁰ Efi w’abufuw ne w’anibere so, sɛ womaa me so, na woatow me akyene.

¹¹ Me nna te sɛ sunsuma a ɛretwam, na me de, mikisa sɛ fan.

¹² Na wo, AWURADE de, wowɔ hɔ daa, na wo nkae kodu awo ntoatoaso nyinaa so.

¹³ Wobɛsɔre abehu Sion mmɔbɔ, na ɛbere a ɛsɛ sɛ wodom no ni, na ɛbere no adu.

¹⁴ Na wo nkoa wɔ n’abo ho koma, na wɔn yam hyehye wɔn, ne mfutuma ho.

¹⁵ Na amanaman besuro AWURADE din, na asase so ahene nyinaa asuro w’anuonyam,

¹⁶ sɛ AWURADE akyekye Sion, wayi ne ho adi n’anuonyam mu,

¹⁷ wadan n’ani akyerɛ onnibie mpaebɔ, na wampo wɔn mpaebɔ.

¹⁸ Wɔbɛkyerɛw eyi ama nkyirimma, na ɔman a wɔbɛbɔ wɔn no beyi AWURADE ayɛ,

¹⁹ sɛ wafi ne soro kronkron hɔ abrɛ n’ani ase ahwɛ fam, AWURADE fi soro na ahwɛ asase,

²⁰ sɛ obetie apokyerɛfo apinisi, na wasan owu mma;

²¹ na wɔabɔ AWURADE din Sion, aka n’ayeyi Yerusalem,

²² da a aman bɛbom aboaboa wɔn ho ano, ne ahenni, sɛ wɔbɛsom AWURADE.

²³ Wagow me tumi mu ɔkwan mu, watwa me nna so.

²⁴ Meka sɛ: Me Nyankopɔn, mmu me nna mu mfa me, wo mfe kyɛ kodu awo ntoatoaso nyinaa so.

²⁵ Tete bemee na wohyɛɛ asase ase, na ɔsoro ne wo nsa ano adwuma.

²⁶ Ɛno de, ɛbɛsɛe, na wo de, wutim hɔ daa. Wɔn nyinaa besuw sɛ atade, wɔbɛsakra wɔn sɛ atade, na wɔasakra.

²⁷ Na wone wo ara, na wo mfe rensa da.

²⁸ Wo nkoa mma bɛtena ase, na wɔn asefo atim w’anim.