Mmebusɛm 6 - KYERƐW KRONKRON

Akagyinamudi ho kɔkɔbɔ

¹ Me ba, sɛ wugyina wo yɔnko akyi, sɛ wudi ɔhɔho agyinam,

² sɛ wonam w’anom asɛm so ama wo ho akyere wo a,

³ yɛ eyi mmom, me ba, na yi wo ho, efisɛ woatɔ wo yɔnko nsam; kɔ kɔkotow, na srɛ wo yɔnko no.

⁴ Mma nna nnkɔ w’aniwa mu, na mma w’anisuatɛtɛw nntɔ nnko;

⁵ yi wo ho sɛ adowa fi ne nsam, sɛ anomaa fi ofirisumfo nsam.

Anihaw ho kɔkɔbɔ

⁶ Ɔkwaadwofo, kɔ ntɛtea nkyɛn, hwɛ n’akwan, na hu nyansa.

⁷ Ɔno na onni otitiriw, ɔpanyin ne sodifo,

⁸ nanso osiesie n’aduan ahohurubere, na ɔboaboa n’adidide ano twabere mu.

⁹ Wobɛda akosi da bɛn, ɔkwaadwofo? Bere bɛn na wobɛsɔre afi wo nna mu?

¹⁰ Nna kakra, nkotɔ kakra, nsa a mɛpono mada kakra.

¹¹ Ɛnna wo hia bɛto wo sɛ ɔkwanmukafo, ne w’ahokyere sɛ ɔkyɛmkurafo.

Nseku ho kɔkɔbɔ

¹² Onipa huhuw ne ɔbarima busuyɛfo, ɔde ano kɔntɔnkye nennamee,

¹³ obubu n’aniwa, ɔde ne nan kasa, ɔde ne nsatea kyerɛkyerɛ ade,

¹⁴ akɔntɔnkyesɛm wɔ ne komam, ɔpam ne tirim apammɔne daa, takrawogyam na ɔhyɛ.

¹⁵ Enti mpofirim na ne sɛe bɛba, wobebubu no afrɛ so a wontumi nsa.

Nneɛma a Onyankopɔn kyi

¹⁶ Ade asia yi na AWURADE tan, Yiw na ade ason na ɛyɛ ne kra akyide,

¹⁷ ani a ɛtra ntɔn, atoro tɛkrɛma, ne nsa a ehwie mogya a edi bem gu;

¹⁸ koma a edwen mmusu adwene, nan a ɛyɛ hare tu mmirika kɔ bɔne mu;

¹⁹ ɔdansekurumfo a ohuw atosɛm, ne nea ɔhyɛ anuanom ntam takrawogyam.

Awaresɛe ho kɔkɔbɔ

²⁰ Me ba, bu w’agya mmara nsɛm, na ntow wo na kyerɛ nkyene.

²¹ Fa kyekyere wo koma ho daa yi, na fa bobare wo kɔn ho hyia.

²² Wonam a, ma enkogya wo, woda a, ɛnhwɛ wo so, na wunyan a, ɛnyɛ wo sɛmɔdɛbɔ.

²³ Na mmara nsɛm no yɛ ɔkanea, na kyerɛ no yɛ hann, na nteɛso nkaanim yɛ nkwa kwan,

²⁴ na ahwɛ wo so afi ɔbea bɔne ho, afi ɔbea hɔho tɛkrɛma dɔkɔdɔkɔ ho.

²⁵ Mma w’ani mmmere n’ahoɔfɛ wo komam, na mma ɔmmfa n’anisuatɛtɛw nnkyere wo.

²⁶ Na ɔbea oguamamfa ma obi di abodoosin, na obi yere buw nkwa a ne bo yɛ den.

²⁷ So onipa de ogya bɛhyɛ ne kokom, na ne ntade renhyew?

²⁸ So obi bɛfa nsramma so, na ne nan renhyew?

²⁹ Saa na nea ɔkɔ ne yɔnko yere nkyɛn te, obiara a ɔka no renni bem.

³⁰ Owifo, sɛ owia ade sɛ ɔredi amee, efisɛ ɔkɔm de no a, wommu ani ngu so;

³¹ na sɛ wohu no a, ɔbɔ ho mpɛn asɔn, ɔde n’afide nyinaa bɛma.

³² Nea ɔfa ɔyere nni ti, nea ɔsɛe ne kra na ɔyɛ saa.

³³ Mmaa ne animguase na obenya, na n’ahohora no, wɔrempopa.

³⁴ Na ninkunu twetwe ɔbarima abufuhyew, na aweredi da no, ɔremfa mfiri;

³⁵ ɔremmu mpata biara, na woma akyɛde dɔɔso po a, ɔrempene.