Mmebusɛm 3 - KYERƐW KRONKRON

Onyankopɔn suro ne nyansa mu mfaso

¹ Me ba, mma wo werɛ mmfi me mmara, na ma wo koma nni me mmara nsɛm so;

² efisɛ onyinkyɛ ne nkwa mfe ne asomdwoe na ɛde bɛka wo ho.

³ Mma adɔe ne nokware nnnyaw wo; fa kyekyere wo kɔn, kyerɛw wo koma pon so.

⁴ Ɛnna wubenya ɔdom ne nimdeɛ pa, Onyankopɔn ne nnipa anim.

⁵ Fa wo koma nyinaa bata AWURADE ho, na mfa wo ho ntweri wo nhumu.

⁶ Hu no w’akwan nyinaa mu, na ɔno na ɔbɛteɛ w’akwan,

⁷ Nyɛ w’ani so onyansafo, suro AWURADE, na dan fi bɔne ho.

⁸ Ɛbɛyɛ ahoɔden ama wo honam, ne akwahosan ama wo nnompe.

⁹ Fa w’ahonyade hyɛ AWURADE anuonyam, ne wo nnɔbae mu adekan nyinaa;

¹⁰ ɛnna ade dodow bɛyɛ w’asan amaama, na wo nsa-kyi-amoa mu nsa foforo bebu so.

¹¹ Me ba, mpo AWURADE nteɛso, na mma n’animka mmfono wo.

¹² Na nea AWURADE dɔ no na ɔka n’anim, sɛ agya yɛ ne ba a ɔdɔ no.

¹³ Nhyira ne onipa a ohu nyansa, ne onipa a onya ntease.

¹⁴ Na emu adenya ye sen dwetɛ de, na ne mfaso sen sika amapa.

¹⁵ Ne bo yɛ den sen mmota, na afɛfɛde nyinaa, wɔmfa nto ho.

¹⁶ Onyinkyɛ wɔ ne nifa mu, ne benkum kura ade ne anuonyam.

¹⁷ N’akwan yɛ akwan a ɛyɛ fɛ, na n’asa nyinaa yɛ asomdwoe.

¹⁸ Ɛyɛ nkwa dua ma wɔn a woso no mu, na nhyira ne nea okura mu.

¹⁹ AWURADE de nyansa na ɛhyɛɛ asase ase, ɔde ntease de ɔsoro tim hɔ;

²⁰ ne nimdeɛ so na abun mu nsu paee, na amununkum sosɔ obosu.

²¹ Me ba, fa nyansahu ne adwempa sie, na mma ɛnnan mmfi w’ani so,

²² na ayɛ nkwa ama wo kra, ne anuonyam ama wo kɔn.

²³ Ɛno na wobɛnantew wo kwan so dwoodwoo, na wo nan anhintiw.

²⁴ Sɛ wokɔda a, woremmɔ piriw, na woda a, wo nna bɛyɛ dɛ.

²⁵ Nsuro mpofirim huyi ne abɔnefo sɛe a ɛbɛba.

²⁶ Na AWURADE bɛyɛ w’ahodasode, na ɔbɛkora wo nan afi ɔkyere mu.

²⁷ Mfa yiyeyɛ nkame nea ɛsɛ no, bere a ɛwɔ wo tumi mu sɛ wobɛyɛ no.

²⁸ Nka nkyerɛ wo yɔnko se: Kɔ na bra! Ne: Ɔkyena mede mɛma, bere a ɛwɔ wo hɔ.

²⁹ Mpam wo yɔnko ho apammɔne, bere a ɔne wo te hɔ dwoodwoo no.

³⁰ Wo ne obi nnni atutuw kwa, bere a ɔnyɛɛ wo bɔne bi no.

³¹ Ntwe otirimmɔdenfo ho ninkunu, nso mpaw n’akwan mu biara.

³² Na ɔkɔnkɔnsani yɛ AWURADE akyide, na teefo na ɔne wɔn di atirimsɛm.

³³ AWURADE nnome wɔ ɔbɔnefo fi, na ohyira treneefo tenabea.

³⁴ Yiw odi afɛwdifo ho fɛw, na ɔdom ahobrɛasefo.

³⁵ Anyansafo benya anuonyam adi, na nkwasea bɛsoa ahohora.