Mmebusɛm 20 - KYERƐW KRONKRON

Potwaa ne sadoi

¹ Nsa yɛ ɔfɛwdifo, mmorosa yɛ otutupɛfo, na obiara a ɔtɔ mu ntintan no nhu nyansa.

² Ɔhene ho hu te sɛ gyata mmobom, nea oyi no abufuw no yɛ ne kra bɔne.

³ Ɛyɛ ɔbarima anuonyam sɛ ɔtwe ne ho fi ɔham mu, na agyimifo de, wɔpɛ ntɔkwaw.

⁴ Awɔw nti Ɔkwadwofo mfɛtɛw, enti twabere mu ɔbɛhwehwɛ biribi, nso ɔrennya hwee.

⁵ Ɔbarima komam agyinatu te sɛ nsu a emu dɔ, nanso nea ɔwɔ nhumu bɛsaw.

⁶ Nnipa bebree ka wɔn ara adɔeyɛ, na onipa ɔnokwafo de, hena na obehu no?

⁷ Ɔtreneeni a ɔnam ne pɛyɛ mu, wobehyira ne mma wɔ n’akyi.

⁸ Ɔhene a ɔte asenni agua so de n’aniwa huw bɔne nyinaa so.

⁹ Hena na ɔbɛka se: Matew me koma mu, me ho afi afi me bɔne ho?

¹⁰ Abrammo ahorow, susukorow ahorow, n’abien nyinaa yɛ AWURADE akyide.

¹¹ Abofra po, wɔde ne nneyɛe na ehu no, sɛ n’adeyɛ bɛyɛ yiye na ateɛ.

¹² Aso a ɛte ne aniwa a ehu, AWURADE na ɔyɛɛ n’abien nyinaa.

¹³ Mpɛ nna, na woanni hia, bue w’ani, na aduan bɛmee wo.

¹⁴ Ɛmfra, ɛmfra! Sɛ ɔtɔfo se ne no, na ɔdan ne ho kɔ a, na ɔhoahoa ne ho.

¹⁵ Sika wɔ hɔ, na nhene pa pii wɔ hɔ, na nimdeɛ ano yɛ adwinni a ne bo yɛ den.

¹⁶ Nea odi ɔhɔho agyinam no, fa ne ntama, na nea odi ɔnanani akagyinam no, gye no awowa.

¹⁷ Aduan a wɔnam nnaadaa so nya yɛ obi dɛ, nanso akyiri no, mmosea yɛ n’anom ma.

¹⁸ Wɔde agyinatu na ɛma tirimpɔw gyina, na fa atɛmpa kyere ɔsa.

¹⁹ Nea okyin di nseku no yi ahintasɛm adi, na mfa wo ho mmɔ okurokurofo ho.

²⁰ Nea ɔdome n’agya ne ne na no, ne kanea bedum sum kabii mu.

²¹ Awunnyade a wɔapere ho anya mfiase no, akyi renwie nhyira.

²² Nka sɛ: Mɛhyɛ bɔne ananmu. Twɛn AWURADE, na ɔbɛboa wo.

²³ AWURADE akyide ne abrammo ahorow, na nsisi nsenia nso nye.

²⁴ Onipa anammɔntu fi AWURADE, na ɛbɛyɛ dɛn na onipa behu n’akwan mu?

²⁵ Ɛyɛ afiri ma onipa sɛ ɔbɛpɛ ntɛm aka sɛ: Ɛyɛ ade kronkron, na ɔbɛhyɛ bɔ ansa na wabisabisa mu.

²⁶ Ɔhene nyansafo huw abɔnefo so, na ɔde teaseɛnam nan fa wɔn so.

²⁷ AWURADE kanea ne onipa ahome, ɛhwehwɛ yam mpia mu hwɛ.

²⁸ Adɔe ne nokware hwɛ ɔhene so, na adɔe so na n’agua tim.

²⁹ Mmerante anuonyam ne wɔn ahoɔden, na nkwakoraa ahoɔfɛ ne dwen.

³⁰ Akuturuku a epira popa bɔne, na ɔhwe popa yafunu mpia mu.