Mmebusɛm 2 - KYERƐW KRONKRON

Nyansahu mu nhyira

¹ Me ba, sɛ wutie me nsɛm, na wode me mmara nsɛm sie wo nkyɛn,

² sɛ wobɛyɛ aso atie nyansa, na woakom wo koma ama ntease,

³ yiw, sɛ wusu frɛ nhumu, na woma wo nne so frɛ ntease,

⁴ sɛ wohwehwɛ n’akyi kwan sɛ dwetɛ, na wobɔre hwehwɛ no sɛ akorade a ahintaw a,

⁵ ɛno na wubehu AWURADE suro, na woahu Onyankopɔn ho nimdeɛ.

⁶ Na AWURADE na ɔma nyansa, n’anom na nimdeɛ ne ntease fi ba.

⁷ Ɔkora nyansahu ma teefo, ɔyɛ ɔkyɛm ma wɔn a wɔnam pɛpɛ,

⁸ sɛ ɔbɛkari atemmu akwan, na wahwɛ n’ahotefo kwan so.

⁹ Ɛno na wubehu trenee ne atemmu ne ade a ɛteɛ ne ɔkwan pa nyinaa mu.

¹⁰ Sɛ nyansa ba wo koma mu, na nimdeɛ sɔ wo kra ani a,

¹¹ adwempa bɛhwɛ wo so, na ntease abɔ wo ho ban,

¹² na ayi wo afi bɔne kwan mu, ne onipa a ɔka akɔntɔnkyesɛm ho,

¹³ afi wɔn a wogyaw trenee akwan kɔnantew sum akwan so no ho,

¹⁴ wɔn a wɔn ani gye bɔneyɛ ho, wodi bɔne akɔntɔnkyesɛm ho ahurusi,

¹⁵ wɔn a wɔn atempɔn kyeakyea, na wɔn akwan dannan.

¹⁶ Na ayi wo afi ɔbea sansani nsam, afi ɔbea sansani a ɔka adɔkɔdɔkɔsɛm no nsam;

¹⁷ ɔno na wapa ne mmabaabere mu kunu, na ne werɛ afi ne Nyankopɔn apam;

¹⁸ na ne fi kom kɔ owu mu, na n’akwan kɔ nsamanfo mu:

¹⁹ Wɔn a wɔkɔ ne ho mu biara nsan, na wɔrensi nkwa akwan mu.

²⁰ Na woafa nnipa pa kwan so, na woadi treneefo kwan so.

²¹ Na teefo na ɛbɛtena asase no so, na wɔn a wɔyɛ pɛ no na ɛbɛtena mu;

²² na wobegu abɔnefo ase afi asase so, na wɔatu nkontompofo afi so.