Mmebusɛm 19 - KYERƐW KRONKRON

Trenee hia

¹ Ohiani a ɔnam ne pɛyɛ mu ye sen nea ɔkyea n’anom nsɛm na ɔyɛ ɔkwasea.

² Ɔkra a nimdeɛ abɔ no nye, na nea ne nan ase yɛ hare no yɛ bɔne.

³ Onipa agyimisɛm dannan ne kwan, na ne koma huru hyɛ AWURADE.

⁴ Ahonyade ma obi nya nnamfo pii, na ɔbrɛfo ne ne yɔnko ntam tetew.

⁵ Ɔdansekurumfo ho renyɛ tɔtorɔtɔɔ, na nea ohuw atosɛm no rennya aguanye.

⁶ Nnipa pii dɛfɛdɛfɛ ɔdɛɛfo, na nnipa nyinaa yɛ ɔyamyefo nnamfo.

⁷ Ohiani nuanom nyinaa tan no, na mpɛn ahe na ne nnamfonom ne no ntam rempan; ɔde nsɛm tiw wɔn a, ɔnto wɔn.

⁸ Nea onya nyansa no dɔ ne kra, nea obu nhumu no, ohu papa.

⁹ Ɔdansekurumfo ho renyɛ tɔtorɔtɔɔ, na nea ohuw atosɛm no bɛyera.

¹⁰ Taamudi mfata ɔkwasea, na menne sɛ akoa bedi mpanyimfo so.

¹¹ Onipa nimdeɛ twentwɛn n’abufuw ase, na mfomso ho twa yɛ no anuonyam.

¹² Ɔhene abufuw te sɛ gyata mmobom, na n’anisɔ te sɛ wura so bosu.

¹³ Ɔba kwasea yɛ n’agya mmusu, na ɔbea atutupɛ yɛ daa nsosɔe.

¹⁴ Ofi ne ahode yɛ agyanom awunnyade, na ɔyere nimdefo fi AWURADE.

¹⁵ Anihaw yɛ nnahɔɔ, na ɔkra kwaadwofo bedi kɔm.

¹⁶ Nea ɔkora mmara asɛm no kora ne kra, na nea ɔnhwɛ n’akwan yiye no bewu.

¹⁷ Nea ohu ɔbrɛfo mmɔbɔ de fɛm AWURADE, na nea ɔde ama no, ɔbɛhyɛ no ananmu.

¹⁸ Anidaso wɔ hɔ yi, teɛ wo ba, na mmɔ wo tirim sɛ wubekum no.

¹⁹ Nea n’abufuw so no benya asotwe, na sɛ wugyaa no a, wobɛsan agyaa no bio.

²⁰ Tie afotu na gye nteɛso, na woahu nyansa w’akyiri nna mu.

²¹ Adwene pii wɔ onipa komam, nanso AWURADE agyinatu na ebegyina.

²² Onipa adɔeyɛ na ɛma wɔdɔ no, na ohiani ye sen ɔtorofo.

²³ AWURADE suro de kɔ nkwa mu, nea okura mu no bɛmee ada, na bɔne bi renka no.

²⁴ Ɔkwadwofo de ne nsa to asanka mu, na ɔnsan mfa nkɔ n’anom po.

²⁵ Bɔ ɔfɛwdifo, na atetekwaa ani bɛtew, na ka nhumufo anim, na wahu nimdeɛ mu.

²⁶ Nea ɔbɔ n’agya atirimmɔden na ɔpam ne na no yɛ aniwu ne ahohora ba.

²⁷ Me ba, sɛ wugyae nteɛso tie a, na wobɛfom afi nimdeɛ nsɛm ho!

²⁸ Ɔdansehuhufo di atemmu ho fɛw, na abɔnefo ano mene mmusu.

²⁹ Wɔasiesie atemmu ama afɛwdifo ne mmaa ama nkwasea akyi.