Mmebusɛm 17 - KYERƐW KRONKRON

Ɔkasa mu nyansa ne nkwaseasɛm

¹ Aduan wesee a asomdwoe wɔ mu ye sen ofi a afɔrebɔde a wɔko ho ayɛ no ma.

² Akoa nimdefo bedi ɔba a ɔyɛ aniwude so, na obenya agyapade mu kyɛfa, anuanom mu.

³ Kyɛmfɛre wɔ hɔ ma dwetɛ, na fononoo wɔ hɔ ma sika; na AWURADE na ɔsɔ koma hwɛ.

⁴ Bɔneyɛfo tie ahuhude ano, ɔtorofo yɛ aso ma mmusubɔ tɛkrɛma.

⁵ Nea oyi ohiani ahii bɔ ne yɛfo ahohora, nea n’ani gye amane ho no, ne ho renyɛ tɔtorɔtɔɔ.

⁶ Nkwakoraa abotiri ne mma mma, na mma anuonyam ne wɔn agyanom.

⁷ Ɔkasatraso mfata ogyennyentwi, na menne sɛ atoro ano bɛfata ɔdehye.

⁸ Ayɛyɛ te sɛ aboɔden bo, nea onyae ani so, baabiara a ɛfa no ɛma ɛyɛ yiye.

⁹ Nea ɔkata mfomso so no hwehwɛ ɔdɔ, na nea oti asɛm mu no tetew nnamfo ntam.

¹⁰ Nkaanim hyɛn nhumufo mu kyɛn sɛ mmaa ɔha hyɛn ɔkwasea mu.

¹¹ Atuatew nko na ɔbɔnefo hwehwɛ, na wɔbɛsoma ɔbɔfo tirimmɔdenfo akɔ no so.

¹² Ma osisi a wɔafa ne mma nhyia wo mmom, na ɛnyɛ ɔkwasea n’agyimisɛm mu.

¹³ Nea ɔde bɔne hyɛ papa ananmu no, bɔne rempa ne fi da.

¹⁴ Atutuw mfiase te sɛ nsu ano tue, enti ɔham mu nnya nyɛɛ den no, gyae.

¹⁵ Nea obu ɔbɔnefo bem ne nea obu ɔtreneeni fɔ no, AWURADE akyide ne wɔn baanu nyinaa.

¹⁶ Ɛdɛn nti na sika wɔ ɔkwasea nsam, sɛ ɔde bɛtɔ nyansa, bere a onni ti?

¹⁷ Adamfo dɔ bere nyinaa mu, na onua, wɔwoo no maa hiada.

¹⁸ Onipa a onni ti na odi akagyinam, na odi ne yɔnko agyinam.

¹⁹ Nea ɔpɛ atutuw no pɛ mmarato, nea ɔma ne dan ano korɔn no hwehwɛ abu.

²⁰ Komam kɔntɔnkyefo nhu papa, na tɛkrɛma dannanfo hwe bɔne mu.

²¹ Nea ɔwo ɔkwasea no, ɔwo nya awerɛhow, na anigye bi nni hɔ mma ogyennyentwi agya.

²² Anigye koma yɛ aduru pa, na honhom a abotow yow nnompe mu.

²³ Ɔbɔnefo gye ayɛyɛde fi kokoam, sɛ ɔrebɛdan atemmu akwan ani.

²⁴ Nyansa wɔ nhumufo anim, na ɔkwasea de, n’aniwa da asase ano noho.

²⁵ Ɔba kwasea hyɛ n’agya awerɛhow ne ne na a ɔwoo no ahometew.

²⁶ Sɛ wodi ɔtreneeni kasa a, enye, na sɛ wɔhwe adɛɛfo a, enye koraa.

²⁷ Nea ɔkyɛe ne nsɛm hu nimdeɛ, na nea ne honhom dwo yɛ nhumu nipa.

²⁸ Ogyimifo po, omua n’ano a, wobu no nyansafo, Yiw, na nea ɔka n’ano tom no, wobu no ɔbadwemma.