Mmebusɛm 16 - KYERƐW KRONKRON

Onyankopɔn hu nnipa nneyɛe

¹ Komam nsiesiei yɛ onipa dea, na tɛkrɛma mmuae fi AWURADE.

² Onipa akwan nyinaa so tew n’ani so, na ahonhom karifo ne AWURADE.

³ Fa wo nnwuma hyɛ AWURADE nsa, na w’adwene betim.

⁴ AWURADE yɛ ade nyinaa ma biribi, ɔbɔnefo mpo ma da bɔne.

⁵ Koma mu kwasiarefo nyinaa yɛ AWURADE akyide, ampa ara, ne ho renyɛ tɔtorɔtɔɔ.

⁶ Wɔde adɔe ne nokware kata amumɔyɛ so, na wɔde AWURADE suro kwati bɔne.

⁷ Sɛ onipa akwan sɔ AWURADE ani a, ɔma n’atamfo po ne no ntam ba asomdwoe.

⁸ Trenee mu ade ketewa ye sen nnɔbae pii a emfi trenee mu.

⁹ Onipa koma na edwen ne kwan ho, na AWURADE na ɔtaataa n’anammɔn.

¹⁰ Nkɔmhyɛ wɔ ɔhene anom, atemmu mu nso n’ano mfom.

¹¹ Abrammo ne nsenia tee yɛ AWURADE dea, fotow mu abo nyinaa yɛ ne nnwuma.

¹² Ahemfo akyide ne abɔnefosɛm di, na trenee mu na agua tim.

¹³ Ahemfo anisɔde ne ano trenee, na nea ɔka nea ɛteɛ no, ɔdɔ no.

¹⁴ Ɔhene anibere yɛ owu bɔfo, na ɔba nyansafo pata no.

¹⁵ Ɔhene animtew mu na nkwa wɔ, na n’anisɔ te sɛ adommere mu mununkum.

¹⁶ Nyansa nya ye sen sika dɛn ara, na nhumu nya sɛ sɛ wɔpaw sen dwetɛ.

¹⁷ Teefo tempɔn ne bɔne kwati, nea ɔhwɛ ne kwan kora ne kra so.

¹⁸ Ahantan di ɔsɛe anim, na kwasiare honhom di asehwe kan.

¹⁹ Eye sɛ wo ne abrɛfo nya ahobrɛase honhom sen sɛ wo ne ahokyerɛfo bɛkyɛ asade.

²⁰ Nea odwen asɛm so no hu papa, na nhyira ne nea ɔde ne ho to AWURADE so.

²¹ Wɔfrɛ komam nyansafo sɛ nhumufo, na ano dɛdɛ ma adenim dɔ.

²² Nimdeɛ yɛ nkwa nsuti ma nea ɔwɔ, na agyimifo asotwe ne wɔn agyimisɛm.

²³ Onyansafo koma kyerɛ n’ano nimdeɛ, na ɛma adenim dɔ n’anom.

²⁴ Nsɛm a ɛyɛ dɛ yɛ ɛwokyɛm, ɔkra adɔkɔdɔkɔde ne nnompe akwahosan.

²⁵ Ɛwɔ ɔkwan bi a ɛteɛ onipa ani so, na n’awiei yɛ owu kwan.

²⁶ Odwumayɛfo kɔm yɛ adwuma ma no, efisɛ n’ano pia no.

²⁷ Obusuyɛfo bɔre bɔne, na n’ano te sɛ ogya a ɛhyehye.

²⁸ Onipa kɔntɔnkye hyɛ takrawogyam, na osututufo tetew nnamfo ntam.

²⁹ Omimdifo sisi ne yɔnko, na ɔde no fa ɔkwan a enye so.

³⁰ Nea omua n’ani dwen akɔntɔnkyesɛm ho, ɔwe n’ano wie bɔneyɛ.

³¹ Abotiri a ɛyɛ fɛ ne dwen, wohu no trenee kwan so.

³² Nea ne bo kyɛ fuw no yɛ sen dɔmmarima, na nea odi ne honhom so no sen nea ɔko fa kurow.

³³ Kokom na wɔtwe ntonto, na ɛho atemmu nyinaa fi AWURADE.