Mmebusɛm 15 - KYERƐW KRONKRON

Nkwagye ne ɔsɛe

¹ Mmuae bɔkɔɔ sianka anibere, na asɛnnennen hwanyan abufuw mu.

² Anyansafo tɛkrɛma ma nimdeɛ yɛ dɛ, na nkwasea ano woro agyimisɛm.

³ AWURADE aniwa wɔ mmaa nyinaa rehwɛ abɔnefo ne apapafo.

⁴ Tɛkrɛmabere yɛ nkwa dua, na emu kyea yɛ honhom mu mmubui.

⁵ Ogyimifo tew n’agya nteɛso ahi, na nea obu nkaanim no ani bɛtew.

⁶ Ɔtreneeni fi wɔ ahode pii, na ɔbɔnefo nnɔbae mu wɔ anitane.

⁷ Anyansafo ano pete nimdeɛ, na nkwasea koma ntim.

⁸ Abɔnefo afɔre yɛ AWURADE akyide, na teefo mpaebɔ yɛ n’anisɔde.

⁹ Ɔbɔnefo kwan yɛ AWURADE akyide, na trenee akyidifo na ɔdɔ no.

¹⁰ Nteɛso a ano yɛ den bɛba nea ogyaw ɔkwan pa no so, na nea okyi animka no bewu.

¹¹ Asaman ne ɔsɛe amoa wɔ AWURADE anim, na menne nnipa mma koma.

¹² Ɔfɛwdifo nnɔ nea ɔka n’anim, ɔnkɔ anyansafo nkyɛn.

¹³ Anigye koma ma anim tew, na komam awerɛhow bubu honhom.

¹⁴ Nhumufo koma hwehwɛ nimdeɛ, na nkwasea ano di agyimisɛm.

¹⁵ Ɔmanehunufo nna nyinaa yɛ bɔne, na koma pa te sɛ daa apontow.

¹⁶ AWURADE suro mu ade ketewa ye sen ahode pii a ɔhaw wɔ mu.

¹⁷ Fam aduan a ɔdɔ wɔ mu ye sen nantwi a wadɔ na ɔtan wɔ mu.

¹⁸ Obufufafo hwanyan atutuw mu, na abodwokyɛrefo pata akayɛ.

¹⁹ Onihawfo kwan te sɛ nsɔe ban, na teefo kwan yɛ petee.

²⁰ Ɔba nyansafo ma n’agya ani gye, na onipa kwasea bu ne na animtiaa.

²¹ Agyimisɛm yɛ nea onni ti anigye, na ɔbadwemma teɛ ne nantew.

²² Wɔkwati agyinakɔ a, tirimpɔw yɛ ɔkwa, na agyinatufo pii mu na ebegyina.

²³ Onipa anom mmuae yɛ anigye ma no, na asɛm a wɔka ne bere mu, eye dɛn ara!

²⁴ Nkwa kwan kɔ ɔsoro ma onimdefo, na wakwati asaman a ɛwɔ ase no.

²⁵ AWURADE dwiriw ahantanfo fi, na ɔhyɛ okunafo hye so den.

²⁶ Ɔbɔne adwene yɛ AWURADE akyide, na nsɛm a ɛyɛ dɛ ho tew.

²⁷ Amim mu mfasopɛfo sɛe ne fi, na nea okyi akyɛde bɛtena ase.

²⁸ Ɔtreneeni koma dwen mmuae ho, na abɔnefo ano woro nsɛmmɔne.

²⁹ AWURADE ne abɔnefo ntam ware, na treneefo mpaebɔ de, otie.

³⁰ Aniwa so tew ma koma tɔ yam, na atesɛm pa ma nnompe mu ba hon.

³¹ Aso a etie nkwa animka no, ɛbɛtena anyansafo mu.

³² Nea ɔpo nteɛso no pa ne kra, na nea otie animka no hu nyansa.

³³ AWURADE suro ne nyansa nteɛso, na ahobrɛase di anuonyam anim.