Mmebusɛm 13 - KYERƐW KRONKRON

Nyansa ne nkwaseasɛm

¹ Ɔba nyansafo tie agya nteɛso, na ɔfɛwdifo ntie ntwiwanim.

² Onipa anom aba so na odi nnepa, na nea nkontompofo kra pɛ ne mmusu.

³ Nea ɔkora n’ano hwɛ ne kra so, nea ɔtɛɛ n’anom nya ɔsɛe.

⁴ Onihawfo kra kɔn dɔ, na onnya, na nsiyɛfo kra bɛdɔ srade.

⁵ Ɔtreneeni tan atosɛm, na abɔnefo yɛ aniwude ne ahohorade.

⁶ Trenee kora nea ne kwan yɛ pɛ, na abɔnefosɛm butuw ɔdebɔneyɛfo.

⁷ Obi yɛ ne ho defo, nso na onni hwee, obi nso yɛ ne ho hiani, nso na ɔwɔ ade pii.

⁸ Obi kra nnwensa ne n’ahonyade, na ohiani de, ɔnte ntwiwanim.

⁹ Treneefo hann dɛw anigye, na abɔnefo kanea bedum.

¹⁰ Ahantan de atutuw nko na ɛba, na wɔn a wotie afotu, nyansa ne wɔn te.

¹¹ Ahonyade a efi ahuhude mu sua, na nea ɔde ne nsa ano boaboa ano no ma ɛdɔ.

¹² Anidaso a ɛkyɛ muba ma koma yare, na anigyinade a ɛba mu yɛ nkwa dua.

¹³ Nea obu asɛm animtiaa de ɔsɛe ba ne ho so, na nea osuro mmara no, obenya akatua.

¹⁴ Onyansafo kyerɛ yɛ nkwa asuti, ɛno na ɔde befi owu afiri mu.

¹⁵ Nimdeɛ pa ma onipa anim ba nyam, na nkontompofo kwan yɛ aboabo.

¹⁶ Onitefo yɛ n’ade nyinaa nimdeɛ mu, na ɔkwasea trɛw n’agyimisɛm mu.

¹⁷ Ɔbɔfo bɔne hwe amane mu, na ɔsomafo nokwafo sa ɔyare.

¹⁸ Ohia ne aniwu ka nea ɔpa nteɛso, na nea obu animka no nya anuonyam.

¹⁹ Akɔnnɔde a adɔ kɔn yɛ ɔkra dɛ, na bɔne mu fi yɛ nkwasea akyide.

²⁰ Wo ne anyansafo mmɔ, na dan onyansafo, na nea ɔne nkwasea bɔ no hu amane.

²¹ Bɔne tiw nnebɔneyɛfo, na treneefo de, ɔde papa tua wɔn ka.

²² Onipa pa gyaw n’ade ma mma mma, na ɔdebɔneyɛfo ahonyade de, wotia ma ɔtreneeni.

²³ Ahiafo adɔw ma aduan pii ba, nanso atɛntrenee nni hɔ a, wɔpra kɔ.

²⁴ Nea ɔkora n’abaa tan ne ba, na nea ɔdɔ no no teɛ no so ntɛmso.

²⁵ Ɔtreneeni bedidi ma ne kra amee, na abɔnefo yafunu bɛda mpan.