Mmebusɛm 12 - KYERƐW KRONKRON

Onyansafo ne ɔkwasea su

¹ Nea ɔdɔ nteɛso dɔ nimdeɛ, na nea ɔtan animka yɛ aboa.

² Onipa pa nya AWURADE anim anisɔ, na onipa busuyɛfo de, obu no fɔ.

³ Onipa remfa abɔnefosɛm so ntim, na treneefo ntini renhim.

⁴ Ɔyerepa yɛ ne kunu abotiri, na nea ɔka aniwusɛm te sɛ nnompe mu porɔw.

⁵ Treneefo adwene teɛ, na abɔnefo agyinatu yɛ nkontompo.

⁶ Abɔnefo nsɛm yɛ mogyatɛw, na teefo ano beyi wɔn.

⁷ Wobutuw abɔnefo, na wonni hɔ, na treneefo fi begyina.

⁸ Onipa nimdeɛ so na woyi no ayɛ, na nea wakyea ne koma no anim begu ase.

⁹ Nea wommu no nanso ɔwɔ akoa no ye sen nea ɔhyehye ne ho na n’aduan bɔ no.

¹⁰ Ɔtreneeni nim n’afieboa kra, na abɔnefo ayamye yɛ atirimmɔden.

¹¹ Nea ɔdɔw n’asase no didi mee, na nea odi nsɛnhunu akyi nni ti.

¹² Ɔbɔnefo pɛ nea nnipa bɔne anya, na treneefo ntini bɛsow aba.

¹³ Ano mfomso yɛ afiri ma ɔbɔnefo, na ɔtreneeni befi ahohia mu.

¹⁴ Onipa anom aba na ɔde bedi papa amee, na onipa nsa ano ade na wɔbɛdan ama no.

¹⁵ Ogyimifo kwan teɛ n’ani so, na nea otie afotu yɛ onyansafo.

¹⁶ Ogyimifo abohuru da adi ntɛm ara, na onitefo kata aniwu so.

¹⁷ Nea ɔka nokware no ka nea ɛteɛ, na ɔdansekurumfo ne, nkontompo.

¹⁸ Ɛwɔ nea ɔworo kasa sɛ nkrante nwowɔe, na onyansafo tɛkrɛma sa yare.

¹⁹ Nokware ano tim hɔ daa, na atoro tɛkrɛma nkyɛ koraa.

²⁰ Nnaadaa wɔ wɔn a wodwen bɔne koma mu, na asomdwoe ho afotufo nya anigye.

²¹ Mmusu biara rento ɔtreneeni, na amane bɛhyɛ abɔnefo ma.

²² AWURADE akyide ne atoro ano, na wɔn a wodi nokware sɔ n’ani.

²³ Onipa nitewfo kora nimdeɛ so, na nkwasea koma pae agyimisɛm mu.

²⁴ Nsiyɛfo nsa bedi panyin, na anihaw nsa beyi tow.

²⁵ Onipa komam awerɛhow botow no, na asɛmpa ma koma tɔ yam.

²⁶ Ɔtreneeni kyerɛ ne yɔnko kwan, na abɔnefo kwan ma wɔfom.

²⁷ Onihawfo nsa nka ne hanam, na nsiyɛfo nya onipa ade a ne bo yɛ den.

²⁸ Trenee kwan so na nkwa wɔ, na akwatikwan de kɔ owu mu.