Mmebusɛm 11 - KYERƐW KRONKRON

Teefo ahotɔ ne abɔnefo ahoyeraw

¹ Nsisi nsenia yɛ AWURADE akyide, na abrammokwanmu yɛ no anisɔ.

² Ahantan ba a, na aniwu ba, na ahobrɛasefo na nyansa ne wɔn te.

³ Teefo pɛyɛ begya wɔn, na nkontompofo nnaadaa bɛsɛe wɔn.

⁴ Adedodow nye mma hwee abufuw da, na trenee gye onipa fi owu mu.

⁵ Pɛyɛfo trenee bɛteɛ ne kwan, na ɔbɔnefo bɛhwe ase n’abɔnefosɛm mu.

⁶ Teefo trenee begye wɔn, na nkontompofo mmusubɔ mu na wɔbɛkyere wɔn.

⁷ Onipa bɔne wu a, n’anidaso yera, na amumɔyɛfo kwanhwɛ yera.

⁸ Wobeyi ɔtreneeni afi ahohia mu, na ɔbɔnefo abesi n’ananmu.

⁹ Nyaatwomni de n’ano sɛe ne yɔnko, na treneefo nimdeɛ na wɔde beyi wɔn.

¹⁰ Treneefo di yiye a, ɔman ho san wɔn, na abɔnefo sɛe a, wohuro.

¹¹ Teefo nhyira na ɛma kurow so, na abɔnefo anom nsɛm na ɛbɔ kurow no.

¹² Nea oyi ne yɔnko ahii nni ti, na ɔbadwemma mua n’ano.

¹³ Osekufo nenam yi ahintasɛm adi, na nea ɔwɔ nokware honhom kata asɛm so.

¹⁴ Nea akwankyerɛ nni no, ɔman hwe ase, na ɔmannwoe wɔ agyinatufo dodow mu.

¹⁵ Nea odi hɔho agyinam no, ebewie no bɔne, na nea ɔtan akagyinam no asom dwo no.

¹⁶ Ɔbea a n’anim tew nya anuonyam, na ɔhoɔdenfo nya ahonyade.

¹⁷ Ɔyamyefo yɛ ne kra yiye, na otirimmɔdenfo haw n’ankasa honam.

¹⁸ Ɔbɔnefo yɛ adwuma hunu, na nea ogu trenee no nya nokware akatua.

¹⁹ Nea otim trenee mu no kɔ nkwa mu, na nea otiw bɔne no nya owu.

²⁰ AWURADE akyide ne koma kɔntɔnkyefo, na wɔn a wɔn kwan yɛ pɛ sɔ n’ani.

²¹ Ampa ara ɔbɔnefo renni bem; na treneefo asefo de, wobegye wɔn.

²² Sɛ sika adwinni te, prako hwene mu no, sɛ ɔbea hoɔfɛfo a onnim nea ɛfata te ne no.

²³ Treneefo ade a wɔpɛ yɛ papa nko; abɔnefo anidaso dan wɔn abufuw.

²⁴ Obi wɔ hɔ a ɔpete, nanso ɔkɔ so dɔ ara; na obi kyɛe so tena so, nanso ehia no ara.

²⁵ Ɔyamyefo bɛdɔ srade, na nea ɔma ebinom mee nso bɛmee.

²⁶ Nea ɔkora aburow so no, nkurɔfo dome no, na nhyira ba nea ɔtɔn no so.

²⁷ Nea ɔpɛ papa akyi kwan no hwehwɛ anisɔ, na nea odi bɔne akyi no, ɛba no so.

²⁸ Nea ɔde ne ho to n’ahonyade so no bɛhwe ase, na treneefo bɛyɛ frɔmfrɔm sɛ ahaban.

²⁹ Nea ɔhaw ne fi bedi mframa, na ogyimifo bɛyɛ komam nyansafo akoa.

³⁰ Ɔtreneeni aba yɛ nkwa dua, na onyansafo gye akra,

³¹ Hwɛ, sɛ wotua ɔtreneeni ka asase so a, na menne ɔbɔnefo ne ɔdebɔneyɛfo.