Mika 7 - KYERƐW KRONKRON

Nnipa pa nnɔɔso

¹ Minnue, na mayɛ sɛ nnuabatew, sɛ bobe aba mpɛpɛwadi, bobe kasiaw a medi, borɔdɔmakan a me kɔn dɔ no bi nni hɔ.

² Nnipa pa ayera afi asase so; teefo nni nnipa mu, wɔn nyinaa tetɛw mogya, wosunsum wɔn nuanom afiri.

³ Wɔn nsa nim bɔneyɛ yiye; ɔsafohene bisa biribi, na ɔtemmufo pɛ kɛtɛasehyɛ, na onipa kɛse ka ne kra bɔnepɛ ho asɛm, na wɔbom susuw bɔne.

⁴ Wɔn mu nipa pa te sɛ ohwirom, wɔn mu teefo sen nsɔe ban. W’awɛmfo da no, w’asotwe aba, ɛno na wɔn sakasakayɛ bedu.

⁵ Munnnye adamfo nnni, mommfa mo ho nnto ɔyɔnko so; ɔbea a ɔda wo koko mu mpo no, ne ho na wɛn w’ano.

⁶ Na ɔbabanin bu n’agya ɔsesafo, ɔbabea sɔre hyɛ ne na, osew sɔre hyɛ n’ase, onipa fifo yɛ n’atamfo.

Anidaso ne adesrɛ

⁷ Na me de, AWURADE na mehwɛ no kwan, mɛtwɛn me nkwagye Nyankopɔn no; me Nyankopɔn betie me.

⁸ Me tamfo, mma w’ani nnnye me ho; na mahwe ase a, mɛsɔre; na mete sum mu a, AWURADE ne me hann.

⁹ Mɛsoa AWURADE abufuhyew no, efisɛ mayɛ no bɔne, de akosi sɛ ɔbɛham me ham ama me, na wabu atɛn ama me; obeyi me afi sum mu aba hann mu; mɛhwɛ ne trenee no.

¹⁰ Na me tamfo behu, na aniwu abɛkata no so, ɔno a ɔka kyerɛɛ me sɛ: Ɛhe na wo Nyankopɔn no wɔ no? Mede m’ani mɛhwɛ no, afei wobetiatia no so sɛ mmorɔn so dɔte.

¹¹ Ɛda a wɔbɛto wo fasu no reba; ɛda no na wobetwiw wo hye akɔ akyirikyiri.

¹² Ɛda no na wobefi Asaria ne Misraim nkurow mu aba, na wobefi Misraim akosi asu no ano, afi po ne po, bepɔw ne bepɔw ntam aba.

¹³ Na asase no bɛdan amamfo ɛsofo no nti, wɔn nneyɛe so aba no nti.

¹⁴ Fa wo poma yɛn wo man, w’agyapade nguan a wɔn nko te kwaem, a asase pa atwa ho ahyia no; ma wonnidi Basan ne Gilead sɛ tete nna no mu.

¹⁵ Mɛma wɔahu anwonwade sɛ nna a wufii Misraim asase so bae no.

¹⁶ Amanaman behu, na wɔn ani awuwu wɔn mmaninne nyinaa ho; wɔde wɔn nsa betuatua wɔn ano, na wɔn aso nso besisiw;

¹⁷ wɔbɛtaforo mfutuma sɛ ɔwɔ, sɛ mmoa a wɔtwe wɔn ho ase, wɔde ahopopo befi wɔn hintabea aba; wɔde ahohim bɛbɛn AWURADE yɛn Nyankopɔn, na wɔasuro w’anim.

Onyankopɔn dom mu ahotoso

¹⁸ Hena ne Onyankopɔn sɛ wo a wode amumɔyɛ kyɛ na wutwa mmarato ho ma w’agyapade nkae no? Ɔrenso n’abufuw mu daa, na adɔe mmom na ɔpɛ;

¹⁹ yɛn ho na ɔbɛsan ama ne yam ahyehye no, ɔbɛpopa yɛn amumɔyɛ; na wobɛtow wɔn bɔne nyinaa agu ɛpo bun mu.

²⁰ Wode nokware bɛkyerɛ Yakob, ne daa adɔe akyerɛ Abraham sɛ wokaa yɛn agyanom ntam fi tete bemee no.