Luka 15 - KYERƐW KRONKRON

Oguan a wayera no

¹ Na towgyefo ne nnebɔneyɛfo no nyinaa twiw bɛn no sɛ wɔrebetie no.

² Na Farisifo ne akyerɛwfo no nwiinwii kae sɛ: Oyi gye nnebɔneyɛfo, na ɔne wɔn didi.

³ Enti Yesu buu wɔn bɛ yi sɛ:

⁴ Mo mu nipa bɛn na sɛ ɔwɔ nguanten ɔha na wɔn mu biako kɔyera a, ɔrennyaw aduɔkron akron no sare so, na onni nea wayera no akyi nkosi sɛ obehu no?

⁵ Na sɛ ohu no a, ɔde no bɔ ne kɔn ho, na n’ani gye.

⁶ Na ɔba fie a, ɔfrɛfrɛ ne nnamfo ne n’afipamfo boa ano ka kyerɛ wɔn sɛ: Mo ne me ani nnye, efisɛ mahu me guan a ɔyerae no.

⁷ Mise mo sɛ: Saa ara na anigye bɛba ɔsoro, ɔdebɔneyɛfo biako a ɔsakra n’adwene ho sen nnipa trenee aduakron akron a enhia wɔn adwensakra.

Dwetɛbona a ayera no

⁸ Anaasɛ ɔbea bɛn na ɔwɔ nnwetɛbona du, na emu biako yera a, ɔrensɔ kanea, na ɔmpra ɔdan no mu, na ɔnhwehwɛ yiye nkosi sɛ obehu?

⁹ Na ohu a, ɔfrɛfrɛ ne nnamfo ne n’afipamfo boa ano, na ɔka sɛ: Mo ne me ani nnye, na mahu me dwetɛbona a ɛyerae no.

¹⁰ Saa ara na mise mo sɛ: Anigye ba Onyankopɔn abɔfo anim ɔdebɔneyɛfo biako a ɔsakra n’adwene ho.

Ɔba hohwini

¹¹ Na ose: Onipa bi wɔ mmammarima baanu.

¹² Na wɔn mu akumaa no ka kyerɛɛ n’agya sɛ: Agya, fa ahode a ɛbɛyɛ me dea no ma me! Na ɔkyɛɛ n’ahode mu maa wɔn.

¹³ Na anni da bi na ɔba akumaa no boaboaa ne nyinaa ano, na otuu kwan kɔɔ akyirikyiri asase bi so; ɛhɔ na ɔkɔbɔɔ ahohwi bra sɛee n’ahode nyinaa.

¹⁴ Na ɔhweree ne nyinaa wiei no, ɔkɔm kɛse bi baa asase no so, na efii ase hiaa no.

¹⁵ Na ɔde ne ho kɔdan asase no so hɔni bi; na ɔma ɔkɔɔ ne mfuw mu kɔhwɛɛ mprako.

¹⁶ Na ne kɔn dɔe sɛ ɔde asɛhono a mprako no di no bi hyɛ n’afuru ma; nanso obiara amma no.

¹⁷ Na n’ani baa ne ho so no, ɔkae sɛ: Apaafo ahe na m’agya nni a wonnya aduan mma ɛmmoro so; na me de, ɔkɔm rekum me yi.

¹⁸ Mɛsɔre makɔ m’agya nkyɛn, na m'ase no sɛ: Agya, mayɛ ɔsoro ne w’anim bɔne.

¹⁹ Na memfata sɛ wɔfrɛ me wo ba bio, na yɛ me sɛ w’apaafo no mu biako!

²⁰ Na ɔsɔre baa n’agya nkyɛn. Na ɔda so wɔ akyirikyiri no, n’agya huu no, na ne yam hyehyee no, na otutuu mmirika kosoo ne kɔn mu, na ofew n’ano.

²¹ Na ɔba no ka kyerɛɛ no sɛ: Agya, mayɛ ɔsoro ne w’anim bɔne, na memfata sɛ wofrɛ me wo ba bio.

²² Ɛnna agya no ka kyerɛɛ ne nkoa sɛ: Momfa atade a eye no mmra mmɛhyɛ no, na momfa pɛtea nhyɛ ne nsa ne mpaboa nhyɛ ne nan;

²³ na momfa nantwi ba a wadɔ srade no mmra mmekum no, na yenni, na yɛn ani nnye,

²⁴ efisɛ me ba yi wui, na wanyan bio; ɔyerae, na wɔahu no. Na wofii ase gyee wɔn ani.

²⁵ Na ne ba panyin no wɔ afum; na ɔreba na ɔrebɛn fie no, ɔtee asanku ne asaw.

²⁶ Na ɔfrɛɛ asomfo no mu biako bisaa no asɛm ko a aba.

²⁷ Na osee no sɛ: Wo nua aba, na w’agya akum nantwi ba a wadɔ srade no, efisɛ ne nsa aka no akwahosan mu.

²⁸ Na ne bo fuwii, na wampɛ sɛ ɔkɔ mu. Ɛnna n’agya fii adi bɛkorɔkorɔɔ no.

²⁹ Na obua see agya no sɛ: Hwɛ mfirihyia dodow yi a mede masom wo, nso memfom wo mmara so da; nanso wommaa me abirekyiba mpo sɛ me ne me nnamfo mfa nkogye yɛn ani da.

³⁰ Na wo ba yi a ɔne nguaman adi w’ahode no bae ara pɛ de, woakum nantwi ba a wadɔ srade no ama no.

³¹ Na n'agya see no sɛ: Ɔba, wowɔ me nkyɛn daa, na nea mewɔ nyinaa yɛ wo dea.

³² Na ɛsɛ sɛ yɛn ani gye na yɛn bo tɔ yɛn yam, efisɛ wo nua yi wui, na wanyan; na ɔyerae, na wɔahu no.