Kwadwom 5 - KYERƐW KRONKRON

Mmɔborohunu ho adesrɛ

¹ AWURADE, kae nea aba yɛn so, hwɛ na hu yɛn ahohora!

² Yɛn agyapade adan ahɔho de, yɛn afi ayɛ ananafo de;

³ yɛadannan nyisaa ne nnyanka, yɛn nanom te sɛ akunafo.

⁴ Nsu a yɛnom no, ɛsɛ sɛ yetua ka; yɛn nnyina, wɔtɔn ma yɛn.

⁵ Wokura yɛn kɔn akyi ka yɛn kɔ; yɛbrɛ, wɔmma yennya ahomeye.

⁶ Yɛde yɛn ho ma Misraim ne Asiria, na yɛanya aduan adi amee.

⁷ Yɛn agyanom ayɛ bɔne, nso wonni hɔ; na yɛn na yɛso wɔn amumɔyɛ.

⁸ Nkoa di yɛn so, nea ɔbɛgye yɛn afi wɔn nsam nni hɔ.

⁹ Yɛn kra da yɛn nsam na yɛkɔpɛ yɛn aduan, efisɛ afoa wɔ sare so.

¹⁰ Yɛn were ayɛ hyerehyere sɛ ɔfononoo, sɛ ɔkɔm a ano yɛ hyew no nti.

¹¹ Wɔhyɛ Sion mmea ne wɔn da, Yuda nkurow mu mmabaa, nyinaa.

¹² Wɔde wɔn nsa sensɛn mmapɔmma, wonni mpanyin anim ni;

¹³ wɔma mmerante yam awiyammo so, na mmofra hwehwe ase, nnyina ase;

¹⁴ mpanyimfo agyae kurow apon mu ba, mmerante agyae wɔn sankubɔ.

¹⁵ Yɛn koma ahosan agyae, yɛn asaw adan nkɔmmɔdi.

¹⁶ Yɛn abotiri ayi atɔ fam; yɛn ara yennue, na yɛayɛ bɔne.

¹⁷ Eyi nti na yɛn koma agurow, eyinom nti na yɛn ani so ayɛ kusuu.

¹⁸ Sion bepɔw a ayɛ amamfo nti, sakraman nenam so.

¹⁹ Wo AWURADE, wote hɔ daa, w’agua tim hɔ, awo ntoatoaso nyinaa mu.

²⁰ Adɛn nti na wo werɛ fi yɛn ma ɛkyɛ saa, na woagyaw yɛn dedaadaw yi?

²¹ AWURADE, san yɛn bra wo nkyɛn, na yɛnsan, ma yɛn nna nyɛ foforo sɛ tete de no.

²² Anaasɛ ɔpa na woapa yɛn koraa, so wo bo afuw yɛn mmoroso?