Kwadwom 4 - KYERƐW KRONKRON

Yuda asotwe ne n’animtiaabu

¹ Ao, sɛ sika abiri tumm, sɛɛ na sika kɔkɔɔ pa a ɛhyerɛn no asakra ni! Wɔatotow kronkronbea abo no agu mmorɔn nyinaa so.

² Sion mma a wɔn bo yɛ den a wɔde amapa kari wɔn no, esii dɛn na wobuu wɔn sɛ dɔte nkuku, ɔnwemfo nsa ano adwuma yi?

³ Sakraman po twetwe wɔn nufu ma wɔn mma num; nanso me nkurɔfo adan atirimmɔdenfo te sɛ nsohori wɔ sare so.

⁴ Osukɔm ma akokoaa tɛkrɛma fam ne dodo mu, mmotafowa srɛ abodoo, obi nni hɔ a obu bi ma wɔn.

⁵ Wɔn a wodii adɔkɔdɔkɔde no ayɛ pasaa, mmorɔn so; wɔn a wɔyɛn wɔn atankɔkɔɔ so no yɛ sumina atuu.

⁶ Na me man babea amumɔyɛ so sen Sodom bɔne no, ɛno na wobutuwii afrɛso a ɛnyɛ nsa na ɛsɛee no.

⁷ N’ahotuafo ho tew sen sukyerɛma, fitaa nso sen nufusu; wɔn honam bere sen ntwoma, wɔn nipadua te sɛ hoabo.

⁸ Afei de, wɔn anim biri sen gyabiriw, wohu wɔn mmorɔn so a, wonhu wɔn; wɔn were afomfam wɔn nnompe ho, akyen kyenkyenenn ayɛ sɛ dua.

⁹ Wɔn a wɔtotɔ afoa ano no de ye sen wɔn a wɔtotɔ ɔkɔm ano a afuw mu nnɔbae a abɔ wɔn nti wokisa hyew no.

¹⁰ Mmea a wɔn yam hyehye wɔn de wɔn nsa noaa wɔn yafumma; wɔde wɔn yɛɛ aduan, me man babea sɛe no mu.

¹¹ AWURADE ayi n’abufuhyew no adi, wahwie n’abufuw a ano yɛ den no agu; wasɔ Sion mu gya, ma ahyew ne nnyinaso.

¹² Asase so ahene ne wiasefo nyinaa annye anni, sɛ ɔhohiafo ne ɔtamfo bɛba abɛhyɛn Yerusalem apon mu.

¹³ N’adiyifo bɔne, n’asɔfo amumɔyɛ nti na ɛbae saa; emu na wohwiee treneefo mogya gui.

¹⁴ Wɔkeka sɛ anifuraefo, mmorɔn so, wɔde mogya agugu wɔn ho fi a enti wontumi nka wɔn ntade.

¹⁵ Wɔteɛɛm kyerɛɛ wɔn sɛ: Momman! Mo a mo ho akum! Momman, momman, mommfa mo nsa nnka! Woguanee, wokokyinkyinii, wɔkae amanaman mu sɛ: Wɔrenkɔ so ntena ha bio!

¹⁶ AWURADE abufuw apansam wɔn, ɔrenkɔ so nhwɛ wɔn; wɔnhwɛ asɔfo anim, mpanyin anim amma onyam.

¹⁷ Yɛn ani da so rehwɛ yɛn boa huhuw kwan, yɛn ahwɛe hɔ na yɛhwɛ ɔman a wontumi nnye yɛn nkwa no kwan ara.

¹⁸ Wɔtoaa yɛn anammɔn, na yɛantumi annantew yɛn mmɔnten so. Yɛn awiei abɛn, yɛn nna ahi; yiw, yɛn awiei adu!

¹⁹ Yɛn atiwfo ho yɛ hare sen ɔsoro akɔre; wotiw yɛn hyerebahyereba mmepɔw so, wɔtetɛw yɛn sare so.

²⁰ Yɛn hwene mu ahome, nea AWURADE asra no no, wɔakyere no wɔn amoa mu, ɔno a yɛkae sɛ: Ne nwini ase na yebenya nkwa, amanaman no mu.

²¹ Ma wo ho nsan wo na w’ani nnye, Edom babea a wote Us asase so no; wo nso so na amanehunu no rebetwam aba, wobɛbow na w’adagyaw so ada hɔ.

²² Sion babea, w’amumɔyɛ so akatua asa! Ɔremma wonkɔ so ntena otukɔ mu; nanso Edom babea, ɔbɛba abetua w’amumɔyɛ so ka, na obeyi wo bɔne adi!