Kwadwom 3 - KYERƐW KRONKRON

Onyankopɔn man no amanehunu ne wɔn awerɛkyekye

¹ Mene ɔbarima a wahu amane, wɔ n’anibere abaa no ano!

² Waka me de me akɔ sum mu, nea hann nni;

³ me nko so na ɔdan ne nsa ba, dan ba, daa adesae.

⁴ Wama me honam ne me were ayɛ afo, wabubu me nnompe.

⁵ Wato fasu afa me ho, na ɔde bɔre ne brɛ atwa me ho ahyia;

⁶ ɔde me atena sum mu, sɛ tete bemee awufo.

⁷ Wabɔ me ho ban, na mintumi mimfi adi, wama me nkɔnsɔnkɔnsɔn ayɛ duru;

⁸ mpo sɛ meteɛm na misu mefrɛ no a, osiw me mpaebɔ kwan;

⁹ ɔde abo a wɔatwa ayɛ m’akwan mu fasu, wakyeakyea m’akwan.

¹⁰ Ɔyɛ osisi a ɔtɛw me, ne gyata a wahintaw;

¹¹ watwe me afi m’akwan so, na watetew me mu, wayɛ me pasaa.

¹² Wakuntun ne ta mu na ɔde me asi hɔ sɛ botae ama agyan;

¹³ wama ne kotoku mu agyan ahyɛn m’asaabo mu.

¹⁴ Mayɛ me man nyinaa asereserede ne wɔn dwom daa adesae.

¹⁵ Wama ade nwenenwene ara nko amee me, wama awɔnwene abow me.

¹⁶ Ɔde me se awe mmosea, wabrɛ me ase ahyɛ nso mu.

¹⁷ Woasum me kra afi asomdwoe ho, me werɛ afi sɛnea ahotɔ te,

¹⁸ na mise: M’anidaso ne nea mehwɛ AWURADE kwan wɔ ho no ayera!

¹⁹ Mekae m’amane ne m’ahometew a, ɛyɛ awɔnwene ne bɔre nko!

²⁰ Me kra kae daa, na abrɛ ase me mu.

²¹ Mede eyi mehyɛ me koma mu, eyi so na mɛtwɛn ara:

²² Ɛyɛ AWURADE adɔeyɛ nti na yenwiee ɔsa ɛ, na ne mmɔborohunu to ntwae ɛ:

²³ Ɛyɛ foforo daa anɔpa; wo nokwaredi dɔɔso.

²⁴ Me kra se: AWURADE ne me kyɛfa, ɛno nti m’ani da no so ara.

²⁵ AWURADE ye ma wɔn a wɔhwɛ no kwan, ma ɔkra a ɔhwehwɛ n’akyi kwan no.

²⁶ Eye sɛ wɔyɛ komm twɛn AWURADE nkwagye;

²⁷ eye ma ɔbarima sɛ ɔsoa kɔndua ne mmerantebere mu.

²⁸ Sɛ ɔde to no so a, ma ne nko ntena ase, na ɔnyɛ komm;

²⁹ ma ɔmfa n’ano mmutuw dɔte mu, ebia anidaso bi wɔ hɔ;

³⁰ ma ɔmfa n’afono mma nea ɔbɔ no, ma ahohora mmee no.

³¹ Na Awurade rentow nkyene daa;

³² na sɛ ɔhyɛ wo awerɛhow mpo a, ne yam hyehye no ara, sɛ n’adɔeyɛ dodow no te;

³³ efisɛ ɛnyɛ ne pɛ sɛ ɔbɛhyɛ obi yaw anaa ɔbɛhaw nnipa mma.

³⁴ Asase so nneduafo nyinaa, ne nan ase na ɔpɛtɛw wɔn,

³⁵ obi bu obi atɛnkyew a ɛwɔ ɔsorosoroni no anim,

³⁶ sɛ obi dan onipa asɛm ani a: So AWURADE nhu anaa?

³⁷ Hena na ɔka na ɛba mu, bere a Awurade nhyɛe ɛ?

³⁸ So ɛnyɛ ɔsorosoroni no anom na mmusu ne papa fi?

³⁹ Adɛn na onipa a ɔte ase di asotwe ho nkɔmmɔ, ɛfa ne bɔne ho?

⁴⁰ Momma yɛmpɛepɛe yɛn akwan mu nhwehwɛ mu, na yɛnsan mmra AWURADE nkyɛn.

⁴¹ Momma yɛmmoma yɛn koma ne yɛn nsa so nkyerɛ Onyankopɔn ɔsoro.

⁴² Yɛn ara na yɛato mmara na yɛatew atua, wo nso woamfa amfiri.

⁴³ Wode abufuw kataa wo ho, na wutiw yɛn, woakum, woankyɛe so.

⁴⁴ Wode omununkum kataa wo ho, na mpaebɔ amfa mu annu wo nkyɛn.

⁴⁵ Wode yɛn ayɛ nwura dodow ne akyide, aman no mfinimfini.

⁴⁶ Yɛn atamfo nyinaa ahanhan wɔn anom ahyɛ yɛn.

⁴⁷ Ehu ne oku, ɔsɛe ne pasaayɛ abɛda yɛn hɔ.

⁴⁸ M’aniwa sen nsu sɛ asuten, me man babea pasaayɛ ho.

⁴⁹ M’aniwa kyi nsu, na ennyae, ennya atwaye,

⁵⁰ kosi sɛ AWURADE besi ne ti ase afi soro ahwɛ.

⁵¹ M’aniwa hyɛ me awerɛhow, me kurow mmabea nyinaa nti.

⁵² M’atamfo taa me kwa sɛ anomaa.

⁵³ Wɔtow me kyenee abura mu anikan, na wosiw me abo;

⁵⁴ nsu bu kataa me ti so; na mise: Wɔatwa me akyene.

⁵⁵ Mifi abura ase tɔnn meteɛɛm mefrɛɛ wo din, AWURADE.

⁵⁶ Wutiee me nne, nsiw w’aso m’ahomegu ne me sufrɛ ho.

⁵⁷ Wutwiw bɛnee, da a mefrɛɛ wo no; wokae sɛ: Nsuro!

⁵⁸ O Awurade, woadi me kra asɛm ama me; woagye me nkwa!

⁵⁹ AWURADE, woahu asɛmmɔne a wodii me; bu atɛn ma me!

⁶⁰ Woahu wɔn aweretɔ no nyinaa, wɔn tirimpɔw a wɔbɔ no me ho nyinaa.

⁶¹ AWURADE, woate wɔn nsopa nyinaa, wɔn tirimpɔw a wɔbɔ no me ho nyinaa!

⁶² Wɔn a wɔsɔre hyɛ me no ano, ne wɔn adwene a wodwen me ho daa adesae,

⁶³ hwɛ wɔn asetena ne wɔn sɔre ɛ! Me ara mene wɔn dwom.

⁶⁴ AWURADE hyɛ wɔn ananmu, sɛ wɔn nsa ano nneyɛe te.

⁶⁵ Ma nkataso nkata wɔn koma so, na wo nnome mmra wɔn so.

⁶⁶ Tiw wɔn, abufuw mu, na sɛe wɔn fi wo AWURADE soro ase.