Hosea 5 - KYERƐW KRONKRON

Ahemman abien no ateɛteɛ

¹ Muntie eyi, O, asɔfo, na monwɛn aso, Israel fi, na ɔhene fi nso, monyɛ aso; na mo so na atemmu aba; na moadan afiri Mispa, ne asawu a wɔatrɛw mu Tabor so;

² na mansotwefo ama wɔn ahohwisɛnni mu adɔ; nanso mɛtwe wɔn nyinaa aso.

³ Me de, minim Efraim, na Israel nso nhintaw me; na afei, Efraim, woabɔ aguaman, na Israel ho agu fi.

⁴ Wɔn nsɛnnii mma wɔnsan mma wɔn Nyankopɔn nkyɛn, na aguamammɔ honhom wɔ wɔn mu, na wonnim AWURADE.

⁵ Na Israel ahantan bedi n’anim adanse, na Israel ne Efraim behintiw wɔn amumɔyɛ mu; Yuda nso ne wɔn ahintiw.

⁶ Wɔde wɔn nguan ne wɔn anantwi bɛkɔ akɔhwehwɛ AWURADE, na wɔrenhu no efisɛ watwe ne ho afi wɔn ho.

⁷ Wɔatwa AWURADE nkontompo, na wɔawowo ananafo mma; afei ɔsram foforo bɛmene wɔn ne wɔn nsase.

⁸ Monhyɛn abɛn Gibea, monhyɛn torobɛnto Rama. Mommɔ ose Bet-awen, hwɛ w’akyi, Benyamin.

⁹ Efraim bɛdan amamfo, asotwe da no; mama wɔahu Israel mmusuakuw ho asɛm a ebetim no.

¹⁰ Yuda mmapɔmma ayɛ sɛ wɔn a wotwiw ɔhye kɔ akyiri, wɔn so na mehwie m’anibere magu sɛ nsu.

¹¹ Wɔhyɛ Efraim so, wɔapɛtɛw no atemmu mu, efisɛ waboapa adi ade hunu akyi.

¹² Na me de, mete sɛ nwewee mema Efraim, ne nhunhunii mema Yuda fi.

¹³ Bere a Efraim huu ne yare, na Yuda huu ne kuru; na Efraim siim kɔɔ Asiria, na ɔsoma kɔɔ ɔhene Yareb nkyɛn; na ɔno nso, ɔrentumi nsa mo yare, na ɔrenkum mo ho kuru.

¹⁴ Na me de, mɛyɛ sɛ gyata ama Efraim, ne gyataforo ama Yuda fi, m’ankasa na mɛtetew mu makɔ, mɛfa makɔ a ogyefo bi nni hɔ.

Ahonu a enye

¹⁵ Mɛkɔ, mɛsan makɔ me baabi, akosi sɛ ɛbɛka wɔn ani na wɔabɛhwehwɛ m’anim; wɔn ho hia wɔn a, wɔbɛhwehwɛ me ntɛm.