Hiob 39 - KYERƐW KRONKRON

Mmoadoma di Onyankopɔn nyansa ho adanse

¹ So wunim abotan so mmirekyi awo bere, na aforote awoko nso, wowɛn?

² Wokan asram a wɔn afuru de nyin, na wunim bere a wɔde wo anaa?

³ Wɔkotow wowo wɔn mma, wɔtow wɔn awoyaw kyene,

⁴ wɔn mma ho kokwaw, wonyin wuram, wofi kɔ, na wɔnsan mma wɔn nkyɛn.

⁵ Hena na ogyaa sare so afurum sɛ ɔnne ne ho, na afurum kakatefo nhama, hena na ɔsan?

⁶ Nea mede sare pradada mayɛ ne fi, na mede nkyene asase mayɛ ne tenabea.

⁷ Ommu kurow mu gyegyeegyeyɛ, ɔnte ɔkafo ateɛteɛ.

⁸ Nea onya mmepɔw so no ne n’aduan, na ɔpɛ ade biara a ɛyɛ frɔmfrɔm.

⁹ So okoo bɛpene sɛ ɔsom wo, anaasɛ ɔbɛtena w’adididaka ho?

¹⁰ So wode hama bɛsa okoo, mfɛtɛwee ka ho, anaasɛ ɔbɛtwe abon mu mfɛtɛwee so adi w’akyi?

¹¹ So n’ahoɔden so nti, wode wo ho bɛto no so, na woagyaw w’adwuma ama no anaa?

¹² So wubegye no adi sɛ ɔde w’aba bɛba, na waboa ano de aba wo san so?

¹³ Sohori bɔ ne ntaban mu ahurusidi mu, ɛyɛ asukɔnkɔn ntakra ne ne ntakra anaa?

¹⁴ Mmom ogyaw ne nkesua ma asase, na mfutuma so na ɔma ɛho dɔ,

¹⁵ na ne werɛ fi sɛ ɛnan bɛpɛtɛw, anaasɛ wuram mmoadoma bɛbobɔ.

¹⁶ Ɔbɔ ne mma atirimmɔden sɛnea wɔnyɛ ne de, ne brɛ yɛ ɔkwa, nanso onsuro,

¹⁷ efisɛ Onyankopɔn ama nyansa abɔ no, na wankyɛ no nhumu.

¹⁸ Na sɛ ɔyere ne ho tu a, ɔserew ɔpɔnkɔ ne ne sotefo.

¹⁹ So wo na wode ahoɔden ma ɔpɔnkɔ? Wo na wode nnawa hyehyɛ ne kɔn?

²⁰ So wo na woma ohuruw sɛ mmoadabi? Ne home foofoo denyɛ yɛ hu.

²¹ Ɔtwerɛtwerɛw obon mu, na odi n’ahoɔden ho ahurusi, ofi kohyia akofofo a wɔamia.

²² Ɔserew ehu, na ne ho mpopo, na ɔnsan mfi afoa anim.

²³ Agyan boha wosow no so, peaw ne pɛmɛ a etwa nyinamnyinam nso.

²⁴ Ɔde anibere ne abufuw twerɛtwerɛw asase, na torobɛnto hyɛn a, onnyina bio.

²⁵ Torobɛnto hyɛn a, ɔka sɛ: Wiɛɛ! Na ɔte ɔko hua wɔ akyirkyiri, asafohene nteɛm ne osebɔ no.

²⁶ So wo nhumu so na ɔsansa nam tu? Ɔtrɛw ne ntaban mu kyerɛ anafo asase.

²⁷ Anaasɛ w’anom asɛm so na ɔkɔre ma ne ho so, na ɔyɛ ne berebuw nea ɛkorɔn?

²⁸ Ɔbotan mu na ɔte na ɔda, ɔbotan ano hwirenhwiren ne ahwɛe sorɔnsorɔn so,

²⁹ ɛhɔ na ofi hwehwɛ aduan, n’aniwa hwɛ ade akyirikyiri.

³⁰ Na ne mma few mogya, na nea atɔfo wɔ no, ɛhɔ na ɔwɔ.