Hiob 37 - KYERƐW KRONKRON

¹ Yiw, eyi ho na me koma tutu, na ɛpopo fi n’afa.

² Otie na muntie ne nne huuyɛ, ne mmobom a efi n’anom no.

³ Ogyaa mu ɔsoro nyinaa ase, na n’anyinam kodu asase anoano.

⁴ Ɔprannaa bobom di akyiri, ɔde ne kɛseyɛ nne no bobom. Sɛ wɔte ne nne a, onsianka wɔn.

⁵ Onyankopɔn de ne prannaa bobom ma ɛyɛ nwonwa, ɔyɛ ade akɛse a yenhu mu,

⁶ na ɔka kyerɛ sukyerɛma sɛ: Tɔ gu asase so! Ne osukɛse nso saa ara sɛ: Tue! Ne n’ahoɔden su akɛse no.

⁷ Ɔsɔ nnipa nyinaa nsa ano, sɛ nnipa a ɔbɔɔ wɔn nyinaa nhu de.

⁸ Ɛnna mmoadoma kɔ wɔn atu mu, na wɔtenatena wɔn tenabea.

⁹ Ahum fi mpiakyiri hɔ ba, na awɔw nso fi atifi fam.

¹⁰ Onyankopɔn home na ɛma nsu nkyenkyenee, na ɛma nsu a ɛtrɛw nso kyenkyen.

¹¹ Nsu ara nko na ɔde soa omununkum, ɔtrɛw ne hann mununkum no mu.

¹² Na ɔma edi kyinhyia sɛ n’akwankyerɛ te, sɛ ɛnkɔyɛ nea ɔhyɛ no nyinaa, wiase nyinaa ne asase ani;

¹³ Sɛ ɛyɛ nteɛso nti oo, sɛ ɛyɛ n’asase nti oo, sɛ ɛyɛ adɔe so oo, ɔma ɛba ara.

¹⁴ Hiob, yɛ aso wɔ eyi ho, gyina hɔ dwen Onyankopɔn anwonwade ho.

¹⁵ So wunim bere a Onyankopɔn susuw ho, na ɔma ne mununkum mu hann hyerɛn?

¹⁶ So wunim omununkum nkarii, nimdeɛ mu mudifo no anwonwade no?

¹⁷ Sɛnea wo ntade mu yɛ hyew, bere a anafo mframa ma asase yɛ dinn no?

¹⁸ So wo ne no na ɛde wim tɔnn a ɛwɔ hɔ pintinn sɛ ahwehwɛ a wɔagu no trɛw hɔ?

¹⁹ Ma yenhu nea yɛnka nkyerɛ no; esum nti yɛrenhu nea yɛnka.

²⁰ So wɔnka nkyerɛ no sɛ mɛkasa? Anaasɛ obi bɛpɛ sɛ wɔmene no?

²¹ Na afei wonhu hann sɛ ɛhyerɛn hyɛnn ewim tɔnn, na mframa twam a, ɛma wim hɔ tew.

²² Atifi fam asase so na sika fi ba, Onyankopɔn ho na anuonyam a ɛyɛ hu wɔ.

²³ Otumfo de, yenhu no, ɔyɛ tumi mu ɔkɛse, na ɔrenkyea atemmu ne trenee a ɛdɔɔso.

²⁴ Enti nnipa suro no, ommu komam nyansafo biara.