Hiob 35 - KYERƐW KRONKRON

¹ Na Elihu kɔɔ so ara kae sɛ:

² So wubu sɛ ɛteɛ, anaa woka sɛ: Me trenee sen Onyankopɔn de,

³ sɛ woka sɛ: Ɛbɛyɛ me mfaso bɛn? Na mfaso bɛn na menya asen sɛ anka meyɛɛ bɔne?

⁴ Me de, mede nsɛm mebua wo ne wo mfɛfo a wɔka wo ho no.

⁵ Hwɛ ɔsoro, na hu, na hwɛ omununkum a ɛkorɔn sen wo no.

⁶ Sɛ woyɛ bɔne a, dɛn na wode yɛ no, na sɛ wo mmarato dɔɔso a, dɛn na woyɛ no?

⁷ Sɛ woteɛ a, dɛn na wode ma no, anaasɛ wo nsam dɛn na ogye?

⁸ Onipa a ɔte sɛ wo na w’abɔnefosɛm pira no, na wo trenee bɛma wanya mfaso.

⁹ Nhyɛso bebrebe nti na ɛma wɔteɛm, wosu frɛ ɔboafo, nnipa akɛse nsa ase.

¹⁰ Nanso obi nka sɛ: Ɛhe na Onyankopɔn, me yɛfo no wɔ? Nea ɔma nnwom anadwo,

¹¹ nea ɔkyerɛ yɛn nimdeɛ sen asase so mmoa, na ɔkyerɛ yɛn nyansa sen ɔsoro nnomaa no.

¹² Ɛhɔ na wɔteɛm, na ommua, abɔnefo ahantan nti.

¹³ Ampa ara, Onyankopɔn rentie ahuhusɛm, na Otumfo remmu.

¹⁴ Na menne sɛ wuse: Wunhu no de, nanso asɛm no da n’anim, na wotwɛn no ara.

¹⁵ Na afei esiane sɛ ɔmmɛtwee aso, n’abufuw mu, na onni amumɔyɛ akyi pii nti,

¹⁶ Hiob bue n’ano kwa, na nimdeɛ a onni mu, ɔma nsɛm dɔɔso.