Hiob 34 - KYERƐW KRONKRON

Elihu kɔ so ara ka Hiob anim

¹ Na Elihu toaa so sɛ:

² Anyansafo, muntie me nsɛm, na mo, animdefo, monyɛ aso mma me.

³ Na aso na ɛsɔ nsɛm hwɛ, na ano ka aduan hwɛ.

⁴ Yɛbɛsɔ atemmu ahwɛ afa, na yɛahu nea eye yɛn ntam.

⁵ Na Hiob aka sɛ: Meteɛ, nanso Onyankopɔn amfa me bem amma me.

⁶ Me bem mu ara na wobu me torofo, m’agyan kuru mu ayɛ den, nanso mmarato bi nni me mu.

⁷ Ɔbarima bɛn na ɔte sɛ Hiob a ɔnom mmusubɔ sɛ nsu,

⁸ na ɔhyɛn amumɔyɛfo ayɔnkofa mu, na ɔne nnipa abɔnefo nantew?

⁹ Na ɔka sɛ: Ɛnyɛ mfaso mma onipa sɛ ɔne Nyankopɔn bɔ.

¹⁰ Enti mo a mowɔ ti, muntie me, ɛmpare Onyankopɔn sɛ obedi asɛmmɔne, na Otumfo bedi amumɔyɛsɛm,

¹¹ na mmom, onipa nneyɛe so ka na otua no, na sɛ obi kwan te no, saa na ɔma ɛto no.

¹² Ampa ara, Onyankopɔn nni asɛmmɔne, na Otumfo nkyea atemmu.

¹³ Hena na ɔde asase hyɛɛ ne nsa, na hena na osiesiee wiase nyinaa?

¹⁴ Sɛ ɔka sɛ ogye n’ahome fa, na ɔtwe ne honhom ne n’ahome ba ne nkyɛn a,

¹⁵ anka ɔhonam nyinaa begyaa mu prɛko, na onipa bɛsan akɔ dɔte mu.

¹⁶ Na sɛ wowɔ nhumu a, tie eyi, yɛ aso ma me nsɛm.

¹⁷ So nea okyi atɛntrenee benya aman so adi? Anaasɛ wubebu ɔtreneeni tumfo no fɔ?

¹⁸ Nea ɔka kyerɛ ɔhene sɛ: Ohuhuni! Ne mmapɔmma sɛ: Abɔnefo!

¹⁹ Nea ɔnhwɛ atitiriw anim, na ommu ɔdehye nsen mmɔboroni; efisɛ ne nsa ano adwuma ne wɔn nyinaa.

²⁰ Mpofirim na wowu, na adasu mu na aman hinhim na wɔsen kɔ, na wɔpra abirempɔn kɔ, nso ɛmfa onipa nsa so.

²¹ Na n’ani wɔ onipa akwan so, na ohu n’akwan nyinaa.

²² Esum nni hɔ, na esum kabii nni hɔ, na amumɔyɛfo de wɔn ho ahintaw hɔ.

²³ Na enhia sɛ ɔhwɛ onipa ma ɛkyɛ ansa na wakɔ Onyankopɔn nkyɛn, atemmu mu.

²⁴ Obubu abirempɔn na ɔnhwehwɛ mu, na ɔde afoforo si wɔn ananmu.

²⁵ Ɛno nti ɔhwɛ wɔn nneyɛe, obutuw wɔn anadwo ma wɔdwerɛw wɔn.

²⁶ Ɔhwe wɔn sɛ abɔnefo, ma nnipa nyinaa hu.

²⁷ Efisɛ wɔman fii n’akyi kɔe, na wɔannwen n’akwan no biara ho,

²⁸ sɛ wɔbɛma mmɔboroni sufrɛ adu ne nkyɛn, na wate amanehunufo sufrɛ.

²⁹ Na sɛ ɔno na ɔma edwo a, hena na obebu fɔ? Na ɔde n’ani hintaw a, hena na ɔbɛhwɛ no? Ɔman mu so oo, obiakofo so oo, odi no pɛ,

³⁰ na onipa kɔnkɔnsani anni hene, na wɔansum ɔman afiri.

³¹ Na so obi bɛka akyerɛ Onyankopɔn sɛ: Mahu amane, merenyɛ amumɔyɛ bio,

³² nea minnya minhui, wo na kyerɛ me, sɛ madi amumɔyɛsɛm a, merenni bio?

³³ Na worepo ne nneyɛe yi, ɔnhyɛ wo ananmu sɛnea wopɛ anaa? Enti wo na ɛsɛ sɛ wopaw, na ɛnyɛ me, na nea wunim no, ka ɛ!

³⁴ Nnipa a wɔwɔ ti bɛka akyerɛ me, na ɔbarima nyansafo betie ama me,

³⁵ Hiob de, ɛnyɛ nimdeɛ so na ɔkasa, na ne nsɛm mu nni nhumu.

³⁶ Sɛ anka ɔbɛsɔ Hiob ahwɛ akosi awiei ɛ, efisɛ ne mmuae te sɛ amumɔyɛfo mmuae.

³⁷ Na ɔde mmusubɔ ka ne bɔne ho, yɛn mu po ɔbɔ ne nsam, na ɔma ne nsɛm a ɔde ne Onyankopɔn di asi no dɔɔso.