Hiob 33 - KYERƐW KRONKRON

¹ Na afei, Hiob, tie me kasa ɛ! Na yɛ aso ma me nsɛm nyinaa.

² Hwɛ, mabue m’ano, me tɛkrɛma rekasa me dodom.

³ Me komam teeyɛ ne me nsɛm, m’ano ka nimdeɛ kronkron.

⁴ Onyankopɔn honhom na ɛyɛɛ me, na Otumfo no ahome na ɛmaa me nkwa.

⁵ Sɛ wubetumi a, yi ano kyerɛ me; Siesie wo ho m’anim, sɔre gyina.

⁶ Hwɛ, me nso, meyɛ Onyankopɔn de sɛ wo ara, anwemmo mu na wotii me nso fii.

⁷ Hwɛ, me ho hu rentu wo koma, na me nhyɛso renyɛ wo so duru.

⁸ Ampa, woaka m’asom, na mate wo nsɛm sɛ wuse:

⁹ Me de, me ho tew, mmarato nni me ho; me ho yɛ tɔtorɔtɔɔ, amumɔyɛ bi nni me ho.

¹⁰ Hwɛ, ohu ntɔkwaw nsɛm wɔ me ho, obu me sɛ ne tamfo.

¹¹ Ɔde me nan hyɛ mpokyerɛ mu, ɔkari m’akwan nyinaa.

¹² Hwɛ, eyi mu na wonteɛ, merebua wo; na Onyankopɔn so sen ɔdesani.

¹³ Adɛn nti na wo ne no ham, sɛ ommua ne nsɛm nyinaa ho?

¹⁴ Nso Onyankopɔn kasa prɛko ne ne mprenu so, nanso onipa nnwen ho.

¹⁵ Ɔdae mu, anadwo adehu mu, nnahɔɔ a atɔ nnipa so mu, nnae so nkotɔ mu,

¹⁶ emu na obue nnipa aso, na ɔsɔ wɔn nteɛso ano,

¹⁷ sɛ ɔbɛsan onipa afi ne nneyɛe ho, na wayi ahantan ahintaw ɔdesani,

¹⁸ na watwe ne kra afi amoa mu, ne ne nkwa nso, na antɔ afoa ano.

¹⁹ Na wɔde ɛyaw twe n’aso ne nnae so, ne ne nnompe mu daa aperedi.

²⁰ Na ne nkwa ma aduan fono no, na ne kra po akɔnnɔduan.

²¹ Ne honam afɔn ma ɛyɛ huna, na ne nnompe a anka wonhu po ada adi.

²² Na ne kra bɛn ɔsɛe Amena, na ne nkwa nso bɛn akumfo.

²³ Sɛ ɔbɔfo dimafo wɔ hɔ ma no, apem no mu biako, sɛ ɔrekyerɛ onipa nea ɛteɛ ma no a,

²⁴ ɛno na ohu no mmɔbɔ ka sɛ: Kogye no, na wankɔ ɔsɛe Amena no mu, na manya agyede, a,

²⁵ ɛnne ne honam yɛ bɛtɛɛ sɛ mmofra de, ɔsan kɔ ne mmerantebere mu.

²⁶ Ɔkotɔ Onyankopɔn a, n’ani sɔ no, na ohu n’anim anigye mu, na ɔdan ɔdesani trenee ma no,

²⁷ na ɔto dwom kyerɛ nnipa sɛ: Mayɛ bɔne, na makyea nea ɛteɛ no, nanso ɔne me anni no sɛnea ɛfata me.

²⁸ Wagye me kra na ankɔ ɔsɛe Amena mu, na me nkwa rehu hann yi.

²⁹ Hwɛ, eyinom nyinaa na Onyankopɔn yɛ mprenu ne mprɛnsa wɔ onipa ho,

³⁰ sɛ ɔbɛsan ne kra afi ɔsɛe Amena ho, na wanya hann, nkwa hann no mu.

³¹ Yɛ aso, Hiob, na tie me; yɛ komm, na menkasa.

³² Sɛ nsɛm bi wɔ hɔ a, yi ano kyerɛ me, kasa, na wo bemdi bɛyɛ me fɛ.

³³ Sɛ ɛnte saa a, ɛnne tie me ara, yɛ komm na menkyerɛ wo nyansa.