Hiob 32 - KYERƐW KRONKRON

Elihu asɛnka a edi kan. Ɔkyerɛ nea enti a ɔkasa

¹ Ɛnna mmarima baasa yi gyaee Hiob bua, efisɛ ɔyɛ n’ani so treneeni.

² Na Busini Elihu a ɔyɛ Barakel ba a ofi Ram abusua mu bo fuwii Hiob, sɛ obu ne ho treneeni sen Nyankopɔn.

³ Na ne bo fuw ne mfɛfo baasa no nso, sɛ wonnya mmuae bi bio, nanso wobuu Hiob fɔ.

⁴ Na Elihu twɛn maa Hiob ne ne mfɛfo no kasae ansa, efisɛ wɔsen no panyin.

⁵ Na Elihu hui sɛ mmuae bi nni mmarima baasa no anom bio no, ne bo fuwii.

⁶ Na Busini Elihu a ɔyɛ Barakel ba buae sɛ: Me de, meyɛ abofra, na mo de, moyɛ nkwakoraa, enti na metɔɔ me bo ase, na misuroe sɛ mɛka nea minim makyerɛ mo.

⁷ Mekae sɛ: Wɔmma onyinkyɛ nkasa, Yiw na mfe dodow nkyerɛ nyansa.

⁸ Ampa, honhom a ɛwɔ ɔdesani mu ne Otumfo ahome na ɛma no nhumu.

⁹ Ɛnyɛ wɔn a wɔanyin pii na wonim nyansa, na ɛnyɛ mpanyin na wohu atemmu mu.

¹⁰ Enti na mise: Muntie me; me nso mɛkyerɛ nea minim.

¹¹ Hwɛ, matwɛn ama mo akasa awie, mayɛ aso mama mo nhumusɛm, sɛ mobɛhwehwɛ anya nsɛm.

¹² Na mewɛn m’aso sɛ meretie mo, na hwɛ, obi nni mo mu a ɔkaa nea ɛtɔ Hiob asom, na otumi buaa ne nsɛm no.

¹³ Na monnka sɛ: Yɛahu nyansa; Onyankopɔn na ɔmmɔ no ngu, na ɛnyɛ onipa.

¹⁴ Efisɛ ɛnyɛ me na ɔkaa ne nsɛm no kyerɛɛ me, na me nso, meremfa mo nsɛm no mimmua no.

¹⁵ Wɔn abam abu, wɔremmua bio, na wɔn anom nsɛm nso asa.

¹⁶ Na sɛ wɔnkasa bio, na wogyina hɔ, na wommua bio nti, mentwɛn anaa?

¹⁷ Me nso mebua me fam de, me nso, mɛkyerɛ nea minim.

¹⁸ Na nsɛm ahyɛ me ma, na honhom a ɛwɔ me mu no hyɛ me.

¹⁹ Hwɛ, me yam te sɛ nsa a wontuu ano, sɛ nsa kotoku foforo a ɛrepɛ apae.

²⁰ Mɛkasa, na manya ahomeye; mebue m’ano, na mabua.

²¹ Ɛmpare me sɛ mɛhwɛ obi anim, na madɛfɛdɛfɛ m’ano mama onipa,

²² na minnim m’ano adɛfɛdɛfɛ, anka ebia ɛbɛka ketewaa sɛɛ, na me yɛfo afa me akɔ.