Hiob 31 - KYERƐW KRONKRON

Hiob kyerɛ sɛ n’abrabɔ teɛ

¹ Apam na me ne m’aniwa apam, na adɛn na memfa m’ani menkari ɔbaabun?

² Na anka dɛn ne Onyankopɔn kyɛfa a efi soro, ne Otumfo agyapade a efi sorɔnsorɔnmmea?

³ So ɛnyɛ ɔsɛe ne obusufo ade, na akatua dennen ne amumɔyɛfo kyɛfa anaa?

⁴ So ɛnyɛ ɔno na ohu m’akwan, na ɔkan m’anammɔntutu nyinaa?

⁵ Sɛ midii ahuhude akyi, na me nan pɛɛ nnaadaa ho ntɛm a,

⁶ ɔnkari me nseniakwanmu mu, na Onyankopɔn nhu me mudi no.

⁷ Sɛ me nan man fii ɔkwan no so, na me koma dii m’aniwa akyi, na nkekae wɔ me nsam a,

⁸ ɛnne wɔmma minnua na obi nni, na wontutu me nnɔbae ngu.

⁹ Sɛ wɔdaadaa me koma ɔbea bi ho, na metɛw me yɔnko pon ano a,

¹⁰ ɛnne ma me yere nyam mma obi, na ebinom nkom no so,

¹¹ na ɛno na ɛyɛ aniwusɛm, na ɛno ne asɛnnifo anim amumɔyɛ.

¹² Na ɛno ne ogya a ɛhyew kɔ ɔyera amoa mu, na anka ebetutu me nnɔbae nyinaa.

¹³ Sɛ mammu m’akoa anaa m’afenaa atemmu hwee bere a wɔne me wɔ ɔham bi a,

¹⁴ ɛnne sɛ Onyankopɔn sɔre a, dɛn na mɛyɛ? Na sɛ obisa a, dɛn na mede mebua no?

¹⁵ So ɛnyɛ nea ɔyɛɛ me no na ɔyɛɛ no ɔyafunu mu, na obiakofo na osiesiee yɛn nyinaa ɛna yam?

¹⁶ Sɛ masianka abrɛfo afi nea wɔhwehwɛ ho, na mama akunafo ani abu,

¹⁷ na me nkutoo madi me m'aduan, na ayisaa anni mu bi a,

¹⁸ mmom efi ne mmofraase na meyɛn no sɛ agya, na efi ne na yam na mekyerɛɛ no kwan,

¹⁹ sɛ mahu obi a ntama abɔ no nti ɔreyera, na nkataho bi nni ohiani nsam,

²⁰ na sɛ n’asen mu anhyira me, na wamfa me nguammaa nwi anhyɛ ne ho hyew,

²¹ na sɛ mama me nsa so ayisaa so, efisɛ mihuu me boa kurow pon mu a,

²² ɛnne me mmati nhuan mfi ne dompe so, na me nsa mmubu mfi ne dompe so.

²³ Efisɛ mmusu a efi Onyankopɔn yii me hu, na ne kɛseyɛ nti mantumi manyɛ hwee.

²⁴ Sɛ mede sika mayɛ m’ahotoso, na maka makyerɛ amapa sɛ m’anidaso ne no,

²⁵ na sɛ m’ani gyei sɛ m’ahode dɔɔso, ne sɛ me nsa aka ade bebree,

²⁶ na sɛ mihuu owia hann sɛ ɛhyerɛn, na ɔsram nam ne haran mu,

²⁷ na ɛdaadaa me koma kokoam, na m’ano few me nsa ho de mae a,

²⁸ na anka mapa Onyankopɔn a ɔwɔ soro no akyi ɛno nso ne ɔtemmufo anim amumɔyɛ bi.

²⁹ Sɛ m’ani gyee me tamfo amanehunu ho, na me ho san me sɛ bɔne ato no a,

³⁰ nso mamma m’ano anyɛ bɔne, sɛ mede nnome mɛhwehwɛ ne wu,

³¹ ampa ara, me ntamadan mufo anka sɛ: Hena na Hiob maa no nam a ammee no?

³² Ɔhɔho biara ansoɛ abɔnten so, mibuee me pon mekyerɛɛ akwantufo,

³³ sɛ mekataa me mmarato so sɛ Adam, na mede m’amumɔyɛ misiee me kokom,

³⁴ efisɛ misuroo nkurɔfo dodow na abusuafo ahohorabɔ yii me hu, na ɛma meyɛɛ komm, mamfi me pon ano mamfi adi a —

³⁵ O, sɛ anka merenya obi a obetie me ɛ! (Hwɛ, m’agyirae ni! Otumfo mmua me!) O, sɛ anka ɔbarima a ɔne me anya no bɛkyerɛw asɛm a ɔne me wɔ no ɛ!

³⁶ Anka ampa ara mede mɛto me mmati, mede mɛbɔ me ti sɛ abotiri,

³⁷ anka mɛkyerɛ no m’anammɔntutu dodow, metwiw mabɛn no sɛ ɔhene.

³⁸ Sɛ m’asase teɛm hyɛ me, na n’akofi de nne koro su,

³⁹ na sɛ midii n’aba na mamma sika, na memaa ɔdede hweree ne kra a,

⁴⁰ ɛnne ma nsɔe mmesi awi ananmu mfifi, na nnɛnkyɛnse mmesi atoko ananmu. Hiob nsɛm no asi.