Hiob 30 - KYERƐW KRONKRON

Hiob kyerɛ ne mprempren asetena mmɔbɔ a ɛyɛ

¹ Na afei wɔn a midi wɔn panyin koraa serew me, wɔn a mepo wɔn agyanom sɛ mede wɔn mɛhyɛ m’akraman a wɔhwɛ me nguankuw so no mu,

² wɔn nsam tumi nso bɛyɛ me dɛn, wɔn a wɔn ahoɔden asa?

³ Ohia ne ɔkɔm nti wɔatwintwam, wɔwewe nkyerekyerewa so nea ɛhɔ yɛ sakasaka, kusuu ne basabasa;

⁴ wɔtetew nkyenhaban nnua so, na sare so nnua ntini ne wɔn aduan.

⁵ Wɔatu wɔn afi nnipa mu, wohuro wɔn sɛ owifo.

⁶ Mmonhwa a ɛhɔ yɛ hu mu na wɔtetee, ɛfam ne abotan mu ntokuru mu;

⁷ Nnua ntam na wɔbobom, nsasono ase na wɔsam.

⁸ Nnyennyentwi mma ne wɔn, wɔn a wonni din mma nso, wɔapam wɔn afi asase so.

⁹ Na afei madan wɔn sanku dwom, na mayɛ wɔn sɛmmɔdɛ.

¹⁰ Wokyi me, wɔma me ne wɔn ntam pan, na wɔnkame sɛ wɔtetew ntasu gu m’ani so.

¹¹ Na sɛ Onyankopɔn asan me hama na wabrɛ me ase nti, wɔn nso atow ahohyɛso akyene wɔ m’anim.

¹² Me nifa so na ahuhufo no asɔre, wosum me nan, na wɔdan wɔn sɛe akwan ba me so.

¹³ Wodwiriw me kwan, wɔboa me sɛe, nso obi bi nsianka wɔn.

¹⁴ Wɔba sɛ obuba a emu trɛw, wɔnam huuyɛ no mu munimuni ba.

¹⁵ Ahuyide adan akyerɛ me so, wɔpam me bakomadi sɛ mframa, na me yiyedi asen kɔ sɛ omununkum.

¹⁶ Na afei me kra nan gu me mu, amanehunu nna asuso me mu.

¹⁷ Anadwo gurow me nnompe wɔ me mu, na ɛyaw a ɛwe me no nnyae;

¹⁸ emu den nko ara nti m’atade asakra, emia me sɛ me kamisaa kɔn.

¹⁹ Watow me akyene atɛkyɛ mu, me ho ayɛ sɛ dɔte ne nso.

²⁰ Misu mefrɛ wo, na wunnye me so, migyina hɔ, na wohwɛ me haa.

²¹ Woadan ayɛ sɛ otirimmɔdenfo ama me, wode wo nsa a ɛyɛ den ne me di asi.

²² Woma me so ma metena mframa so kɔ, na woma menan huuyɛ mu.

²³ Na minim sɛ wode me bɛsan ama owu ne ofi a ateasefo hyia mu no.

²⁴ Nanso so obi nteɛ ne nsa nhwehwɛ ogye odwiriw mu, na sɛ obi reyera a, onsu mfrɛ ɔboafo anaa?

²⁵ So mansu mamma nea ɔwɔ amane mu, ohiani anyɛ me kra mmɔbɔ anaa?

²⁶ Na metwɛn adepa, nso bɔne na aba, na m’ani daa hann so, na esum kabii aba.

²⁷ M’ayamde huru, na ennyae, amanehunu nna ato me.

²⁸ Mabiri tumm menenam, nso emfi awia, mesɔre bagua mu na meteɛm.

²⁹ Madan sare so akraman nua, ne sohoribere adamfo.

³⁰ Me were abiri rewae afi me ho, na ahohuru nti me nnompe ahyew.

³¹ Na me sanku adan abooboodi, na me bɔtɔwa adan asufo nne.