Hiob 29 - KYERƐW KRONKRON

Hiob kyerɛ n’ahotɔ a atwam

¹ Na Hiob kɔɔ so maa n’abebusɛm so sɛ:

² O, sɛ anka mɛyɛ sɛ mete kan asram no, sɛ nna a Onyankopɔn hwɛɛ me so no ɛ!

³ Bere a ne kanea hyerɛn m’atifi, na mede ne hann menantew sum mu no!

⁴ Sɛnea na mete me twabere nna mu, bere a Onyankopɔn ayɔnkofa wɔ me ntamadan mu no;

⁵ bere a Otumfo ne me da so wɔ hɔ, na me mmofra nso atwa me ho ahyia,

⁶ bere a me nan ho fɔwee nufusu mu srade mu, na abotan maa ngo asubɔnten sen me hɔ no.

⁷ Mifi adi mekɔ kurow pon ano, na mede m’agua misi mprae so a,

⁸ mmerante hu me, na wohintaw, na nkwakoraa sɔre gyinagyina.

⁹ Mmapɔmma gyae kasa, na wɔde wɔn nsa butuw wɔn ano.

¹⁰ Mmakoma nne taa dinn, na wɔn tɛkrɛma fam wɔn dodom.

¹¹ Na aso te a, ehyira me, na aniwa hu me a, edi me adanse.

¹² Efisɛ miyi ɔmanehunufo a osu frɛ ɔboafo, ne ayisaa a onni boafo.

¹³ Nea ɔyɛ ayera no nhyira ba me so, na mema ɔbea kunafo nya abotɔyam.

¹⁴ Mifura trenee na efura me, m’atemmusɛm te sɛ atade yuu ne abotiri:

¹⁵ Meyɛɛ aniwa maa onifuraefo, ne nan nso maa apakye;

¹⁶ meyɛɛ agya maa ahiafo, na nea minnim no mpo asɛm, mehwehwɛɛ mu maa no;

¹⁷ na mibubuu omumɔyɛfo sebɔmmɔfo, na mihwim afow ade mifii ne se mu.

¹⁸ Na mekae sɛ: Me berebuw ara mu na megyaa mu, na mama me nna adɔɔso sɛ nwea;

¹⁹ me ntini mu bebue ama nsu, na obosu nso atena mman so.

²⁰ M’anuonyam yɛ foforo ma me, na me ta anya denyɛ foforo me nsam.

²¹ Me na wotie me na wɔtwɛn me, na wɔyɛ komm tie m’afotu;

²² me kasa akyi wɔnsan nkasa bio, na me nsɛm sosɔ gu wɔn so:

²³ Na wɔtwɛn me sɛ wɔtwɛn osutɔ, na wɔtɛɛ wɔn anom sɛnea wɔde regye adonsu.

²⁴ Meserew mekyerɛ wɔn a anidaso abɔ wɔn, na m’anim a ɛtew no, wɔmma engu ase.

²⁵ Mepaw wɔn kwan memaa wɔn, metenaa ase sɛ otitiriw, na metenaa hɔ sɛ ɔhene asafo mu, sɛ nea ɔkyekye abooboodifo werɛ.