Hiob 23 - KYERƐW KRONKRON

Hiob srɛ sɛ: Onyankopɔn mma onnyina n’atemmu agua anim

¹ Na Hiob gyee so sɛ:

² Ɛnnɛ na me nkɔmmɔdi mu ayɛ den, na me pira ayɛ den asen m’apinisi.

³ O, sɛ anka minya mihu nea mehu no, na mikodu ne tenabere ɛ!

⁴ Anka mehwie m’asɛm agu n’anim, na mabisabisa no nsɛm ara yiye.

⁵ Na anka mehu nsɛm a ɔde bebua me, na mate nea ɔbɛka akyerɛ me.

⁶ So tumi dodo na ɔde ne me bɛham? Daabi, aso nko na ɔbɛyɛ ama me.

⁷ Ɛhɔ na ɔteneneeni ne no beyi ntɛn, na mafi me temmufo nsam korakora.

⁸ Hwɛ, mekɔ m’anim, nso onni hɔ, ne m’akyi nso, nso minhu no;

⁹ na ɔyɛ n’ade benkum a, m’ani mmɔ no so, ɔman nifa a, minhu no.

¹⁰ Na onim kwan a mefa so. Ɔsɔ me hwɛ a, mefi mu sɛ sika mmapa a afa ogya mu.

¹¹ Ne nammɔn mu na me nan tintimii dennennen, mahwɛ ne kwan, na mamman.

¹² N’anom mmara, mamfi ho, makora n’anom nsɛm sen nea ehia me.

¹³ Nso ɔno de, ɔnsakra da, na hena na ɔbɛsan no? Na nea ɔpɛ na ɔyɛ.

¹⁴ Nea wahyɛ ama me na ɔbɛma aba, na ade a ɛte sɛɛ pii na ɛwɔ ne tirim.

¹⁵ Enti ehu ka me n’anim, midwen me tirim, na me ho popo wɔ ne ho.

¹⁶ Na Onyankopɔn ama me koma abubu, na Otumfo no ayi me hu,

¹⁷ efisɛ manyera esum no mu, na wakata esum kabii no so m’anim.