Hiob 19 - KYERƐW KRONKRON

Hiob nim sɛ Onyankopɔn begye no

¹ Na Hiob gyee so sɛ:

² Mobɛhaw me kra akosi da bɛn, mode nsɛm abubu me pasaa?

³ Mpɛn du ni a moasopa me, mo ani nwu sɛ mohow me werɛ.

⁴ Na mpo, sɛ ampa na mafom a, me so na mfomso no da.

⁵ Sɛ ampa sɛ moma mo ho so hyɛ me, na muyi me m’ahohora ho ntɛn a,

⁶ ɛnne munhu sɛ Onyankopɔn na wakyea me kwan ama me, na ɔde n’asawu atwa me ho ahyia.

⁷ Hwɛ, ayayade nti meteɛ mu, nso wonnye me so; misu mefrɛ ɔboa, nso ogyefo bi nni hɔ.

⁸ Ɔde ban atwa me kwan mu, na mintumi mensen, na me kwan so aduru sum.

⁹ Wayi m’anuonyam afi me so, na wahotiri me ti so abotiri.

¹⁰ Wabubu me afa nyinaa a minni hɔ bio, na watu m’anidaso ase sɛ dua.

¹¹ Wama n’abufuw afram me so, na obu me sɛ n’atamfo mu biako.

¹² N’asafo horow bɔɔ mu bae, na wɔbɔɔ wɔn akwan wɔ me so, na wɔbɔɔ nsra twaa me ntamadan ho hyiae.

¹³ Wayi me nuanom afi me ho kɔ akyirikyiri, na m'amannimfo adannan me ahɔho koraa;

¹⁴ m’abusuafo atwe wɔn ho kɔ, na me nnamfo paa werɛ afi me;

¹⁵ wɔn a wɔbɛtena me fi ne me mmaawa bu me sɛ ɔhɔho, madan wɔn ani so ɔnanani;

¹⁶ mefrɛ m’akoa na ommua me, mede m’ano mepa no kyɛw po.

¹⁷ Me yere po kyi me home, me yafumma mpo mpɛ m’ahomegu.

¹⁸ Ntɔtɔfifiwa po bu me animtiaa, mise mesɔre a, wɔkasa tia me.

¹⁹ Me ho yɛ me nnamfo pa nyinaa nwini, na m’adɔfo adan wɔn ani ahyɛ me.

²⁰ Me nnompe fomfam me were ne me nam ho, na me se ho were nko na mede mafi mu.

²¹ Munhu me mmɔbɔ, munhu me mmɔbɔ, me yɔnkonom, na Onyankopɔn nsa aka me.

²² Adɛn nti na mutiw me sɛ Onyankopɔn, na me nam nso mmee mo?

²³ O, sɛ anka wɔrekyerɛw me nsɛm ɛ! Sɛ wɔde rehyɛ nhoma mu ɛ!

²⁴ Sɛ wɔde dade kyerɛw ade ne sumpii rekurukyerɛw ɔbotan mu na atena hɔ daa ɛ!

²⁵ Na me de, minim sɛ me dimafo te ase, na awiei no, obedi m’asɛm ama me wɔ asase yi so.

²⁶ Na wɔasɛe me were sɛɛ yi akyi no, na metu mafi me honam mu makɔhwɛ Onyankopɔn.

²⁷ Ɔno na me ara mɛhwɛ no mafa, na m’aniwa behu, na ɛnyɛ obi foforo. M’asaabo resa wɔ me mu.

²⁸ Sɛ muse: Yɛbesi dɛn atiw no, Na yɛahu asɛm no ase wɔ ne hɔ, a,

²⁹ munsuro afoa, efisɛ abufuhyew de afoa asotwe ba, na moahu sɛ atemmu wɔ hɔ.