Hiob 14 - KYERƐW KRONKRON

Hiob di onipa mmɔborɔyɛ ho abooboo

¹ Onipa a ɔbea awo no, ne nna yɛ tiaa bi, na ɔhaw mee no;

² opue sɛ nhwiren, na wotwa; oguan sɛ sunsuma, na onnyina.

³ Na so oyi so na woabue w’ani, na wode me rekɔ atemmu mu w’anim?

⁴ Hena na obenya ɔhotefo, wɔn a wɔn ho akum no mu? Obiara nni hɔ.

⁵ Sɛ wɔahyɛ ne nna ato hɔ, na n’asram dodow wɔ wo tirim, na woatwa ɔhye a ɔrentwa ho ama no a,

⁶ ɛnne yi w’ani fi no so na ɔnhome nkosi sɛ obewie ne da sɛ ɔpaani.

⁷ Na dua po, anidaso wɔ hɔ ma no, sɛ wotwa a, ɛbɛfefɛw bio, na ne nnubaa remmɔ no:

⁸ Sɛ ne ntini kyenkyen ɛfam, na ne nsim wu dɔte mu a,

⁹ nsu hua nti ɛfefɛw, na eyiyi abaa sɛ dua a wɔatɛw;

¹⁰ na onipa de, owu, na ɔbea hɔ, na onipa gyaa mu, na ɔwɔ he?

¹¹ Nsu fi po mu dɔ mpumpunase, na asu nso mem na ɛyow:

¹² Saa ara na onipa kɔda hɔ, na ɔnsɔre. Ɔsoro nnya ntwaam yi, wɔrennyan, na wɔrenwosow wɔn mfi wɔn nna mu.

¹³ Oo, sɛ wode me sie asaman ɛ, sɛ wode me hintaw kosi sɛ w’abufuw bɛsan akɔ ɛ, sɛ wohyɛ me da na wokae me ɛ!

¹⁴ So onipa wu a, ɔbɛtena ase bio anaa? Anka m’akodi nna nyinaa mɛtwɛn akosi sɛ me sakra bɛba.

¹⁵ Anka wobɛfrɛ, na me nso magye wo so, anka w’ani begyina wo nsa ano adwuma no.

¹⁶ Nanso afei de, wokan m’anammɔn, na wunyi w’ani mfi me bɔne so.

¹⁷ Wɔasɔ me mmarato ano de ahyɛ kotoku mu, na woakyekye me bɔne ano.

¹⁸ Ampa ara bepɔw po hwe ase yera, na ɔbotan nso twiw fi n’afa;

¹⁹ abo nso, nsu fi mu, ne yiri pra fam dɔte kɔ, na ɔdesani anidaso, woma ɛyera.

²⁰ Wutintim no so ma otwam kɔ, wosakra n’anim na wusum no kɔ;

²¹ ne mma nya anuonyam mpo a, onnim, na sɛ wɔbrɛ wɔn ase nso a, onhu mma wɔn.

²² N’ankasa ne honam yaw nka na ɔte, na ne kra di n’ankasa ne ho abooboo.