Hiob 11 - KYERƐW KRONKRON

Sofar asɛnka a edi kan: Ɛsɛ Hiob sɛ ɔbrɛ ne ho ase Onyankopɔn anim

¹ Ɛnna Naamani Sofar gyee so sɛ:

² So wɔremmua nsɛnnodow yi anaasɛ wɔmma ɔbarima tɛkrɛmafo nni bem?

³ So wo kasa birebire bɛma nnipa amua wɔn ano? Na sɛ wudi fɛw a, obi renhyɛ wo aniwu anaa?

⁴ Na woaka sɛ: Me kyerɛ yɛ gyenennyenen, na me ho tew wɔ Onyankopɔn anim.

⁵ Oo anka ma Onyankopɔn nkasa na ommue n’ano nkyerɛ wo.

⁶ Na wakyerɛ wo, ne nyansa mu ahintasɛm, sɛ emu dɔ yiye, na hu sɛ Onyankopɔn yi n’ani fi w’amumɔyɛ no bi so.

⁷ So wobɛbɔre ahu Onyankopɔn anaasɛ wubehu akodu Otumfo pɛyɛ mu?

⁸ Ɛkorɔn sɛ ɔsoro, dɛn na wobɛyɛ? Ɛyɛ kuronkuron sɛ asaman, dɛn na wunim?

⁹ Ne nsusuwii ware sen asase, na ɛtrɛw sen ɛpo.

¹⁰ Sɛ otwam ba, na ɔde nnipa gu nnua mu na ohyia asɛnni a, ɛnne hena na obesianka no?

¹¹ Na ɔno na onim nnipa ahuhufo, na ohu abusude, nanso ommu.

¹² Na onipa tibɔnkɔso nya nyansa koma a, na ɛte sɛ wɔawo ahafurum sɛ onipa.

¹³ Sɛ wo de, wusiesie wo koma, na wotrɛw wo nsam kyerɛ no a,

¹⁴ sɛ amumɔyɛ wɔ wo nsam a, yi kɔ akyiri, na mma abusude nntena wo ntamadan mu.

¹⁵ Ɛno na wobɛma w’ani so a wunni dɛm, na wubetim pintinn a worensuro.

¹⁶ Na wo werɛ befi wo haw, wobɛkae no sɛ nsu a asen.

¹⁷ Na wo nkwa nna bɛyɛ sɛ awia ketee, esum bɛdan sɛ adekyee.

¹⁸ Na wubenya abotɔyam sɛ anidaso wɔ hɔ, wobɛhwɛ wo ho ahyia, na woada dwoodwoo.

¹⁹ Wobɛda ahome, na obi renyi wo hu, na nnipa bebree bɛhwehwɛ wo hɔ dom.

²⁰ Na abɔnefo de, wɔn ani so besiw na guankɔbea bɛbɔ wɔn, na wɔn anidaso bɛdan wɔn owu.